Pele ga Metsesetoropo
Cape Town e ne e le lefelo le le farologaneng thata ka malatsi ao. Gompieno, go na le mafelo-bodulo go simolola kwa toropokgolong go ralala lefatshe le le anameng go fitlha kwa dithabeng tsa Helderburg, kwa letlhakoreng le le kgakala la False Bay. Fela mo dingwageng tsotlhe tsa maloba, go ne go sena sepe – go ne go sena Gugulethu, Khayelitsha kgotsa Mitchells Plain, kwa dimilione tsa batho di dulang teng ga jaana.
E ne e le sekgwa fela, se se tsenelelang go ya kwa bokgakaleng. Ke dutse le mmê wa me kwa District Six mo bogareng jwa toropokgolo. E ne e le modiri wa legae mo Kloof Flats kwa Kloof Nek Road. Nako dingwe o ne a robala kwa ntlong ya mothapi wa gagwe, yo a neng a bitswa Mohumagadi Orren.
E ne e le mosadi yo o siameng, Mohumagadi Orren – ke ênê a nthutileng go roka le go loga mesomelwana ya matsogo le dikousu le dijeresi tse ke santseng ke di dira le gompieno.
Thuto ya Diatla
Ga ke a tsena sekolo. Mmê wa me o ne atle are, ‘Ga ke batle gore o ye kwa sekolong sa batho bammala.’. O ne gape a sa batle ke tshameka le bana bammala. Ke ne ke sa tlhaloganye gore ke goreng. Ka jalo tsatsi le tsatsi ke ne ke ya tirong le ênê, mme ke dirisa nako ya me kwa go phepafatsa ntlo, ke fiela fa fatshe, ke phepafatsa diphaposi tsa go tlhapela.
Ke ne ke rata seo, ka gonne se ne se bonagala jaaka sengwe se se siameng go ka dirwa. Nkoko wa me o ne a nthutile ka metlha gore basetsana ga ba tshwanela go dula fela ba sa dire sepe letsatsi lotlhe, mme re tshwanetse go dira fa gae ka gonne, o ne are, ‘Tsatsi lengwe o tlile go nyalwa mme o tlhoka go itse go ka nna le ntlo e e leng ya gago, le go nna mmê’
District Six
District Six e tumile morago ga gore balaodi ba tlhaolele ba kgorope matlo otlhe le go pateletsa botlhe gore ba tswe kwa teng, ka gonne ba ne ba sa batle batho bantsho le bammala gaufi le bogare jwa toropokgolo. Seno se ne se sa nkame, ka gonne ka nako enô ke ne ke setse ke nyetswe mme ke dula le monna wa me.
Fela go ne go le thata mo go mmê wa me. O ne a tshwanetse ke go tsamaya le go dula kgakala le lefelo-tiro la gagwe, mme go ne go tsaya maeto a le mararo a bese, mo go rayang gore diuraura tsa loeto, go fitlha teng tsatsi le letsatsi.
Translated by Nchema Rapoo