Kunga se va na lokixi
Cape Town ariri doroba kumbe ndzhawu yohambana himinkarhi liya. Namuntlha, kuna tindzhawu to tshama hinkwako kuya fika etintshaveni ta Helderberg, eka tlhelo lerinwana ra False Bay. Kambe eka malembe hinkwawo lawa ya hundzeke, aku ngari na nchumu — kungari na Gugulethu, Khayelitsha kumbe Mitchells Plain, laha mamiliyoni ya vanhu vatshamaka kona namutlha.
Akuri nhova ntsena, kuya eka mpfhuka lowukulu swinene. Andzi tshama na mhani wa mina e District Six exikarhi ka doroba. Mhani ava tirha endlwini tani hi mupfuneti e Kloof Flats eka gondzo ra Kloof Nek Road. Minkarhi yinwana ava tirha vatlela kwale ntirhweni laha muthori wa vona loyi ativeka hi vito ra Mrs Orren a tshama kona.
Ari wansati wa kahle swinene, Mrs Orren — ari yena loyi anga ndzi dyondzisa ku rhunga, naku luka tigloves na masokisi na majesi lawa ndzi wa endlaka kufikela namuntlha.
Dyondzo ya ntiyiso
Andzi yangi exikolweni. Mhani wa mina ava rhandza kuvula leswaku, 'Ava lavi ndziya eka swikolo swa ma-coloured.' Avanga lavi ndzi tlanga na vana va ma-coloured. Andzi nga switwisisi leswaku hikokwalaho ka yini. Se siku rinwana na rinwana andzi ta famba navona entirhweni naswona andzita teka nkarhi ndziri karhi ndzi basisa yindlu, ndzi kukula rivala naku basisa swihambukelo.
Andzi switsakela swinene hikuva aswi twala kuri leswi andzi fanele ku swiendla. Kokwani wa mina vandzi dyondzise leswaku vanhwenyani ava fanelanga ku tshama hi mavoko siku hinkwaro hinga tirhi nchumu hifanele kutirha ekaya, loko vavula avaku 'Siku rinwana uta tekiwa naswona uta fanela kutiva kubasisa yindlu ya wena nakuva mutswari.'
District Six
District Six yivuye yi duma swinene endzhaku kaloko mfumo wa xihlawuhlawu wutava wu bindzimuxe tiyindlu hinkwato naku hlongola vanhu hinkwavo hikuva avanga lavi vanhu va vantima na ma-coloured kusuhi na doroba. Leswi aswindzi khumbanga, hikuva hinkarhi lowu se andzi tekanile na nuna wa mina naswona ahi tshama swinwe.
Kambe leswi aswi tikela mhani wa mina. Ava boheka kuya tshama kule swinene na laha vatirhaka kona naswona aswilava mabazi yanharhu kuva fikisa kona, leswi aswivula leswaku vatava na nkarhi wolenha endleleni kuya fika entirhweni masiku hinkwawo.
Translated by Ike Ngobeni