Ngaphambi Kwamalokitjhi
Ikapa kwabe kuyindawo ehluke khulu ngamalanga layo. Namhlanjesi, kunendawo lapha kuhlala khona abantu kusukela edorobheni kufikela endaweni efika entabeni ye-Helderberg, nanyana ngale kwe- False Bay.
Kodwana ngeminyaka leyo, kwakunganalitho, kunganaGugulethu, kanye neKhayelitjha nanyana iMitchells Plain, lapha sele kuhlala khona iinkulungwana zabantu kwanjesi.
Kwakunamahlathi kwaphela, afika kude le. Ngangihlala nomma eDistrict Six phakathi kwedorobho. Wayesebenza emakhitjhini emafledzini we Kloof, eKloof Nek Road.
Ngesinye isikhathi bekalala lapho egade asebenza khona, kumqatjhi wakhe u-Mrs Orren. Bekangumma olungileko, begodu u-Mrs Orren nguye owangifundisa ukuthunga nokukorotjha amahasikune, namakawosi, namajersi esele ngiwenza namhlanjesi.
Ifundo Yokwenza
Khange ngiye eskolweni. Umma khabathi kimi,’angifuni uye eskolweni sama-coloured. Bekathi akafuni ngidlale nabantwana bama-coloured. Bengingazwisisi bonyana kubayini.
Njeke malanga woke bengiya emsebenzinakhe naye, ngiphuthe ngendlini, ngithanyele phasi, ngikulumage nekumbeni yokugeza.
Ngangikuthanda lokho ngombana, bengizwa anga yinto elungileko. Ugogo wangifundisa bona abentazana abahlali ilanga loke bangenzi litho, begodu kufanele sisebenze emakhaya ngombana wathi, 'Ngelinye ilanga nizokutjhada, begodu nitlhoga ukwazi bona kunjani ukuba nomzakho, nokuba ngumma.'
I District Six
I District Six yaduma khulu ngemva kokobana bomthetho bebandlululo bagirize izindlu zawo woke umuntu obekahlala khona, bebakatelela boke abantu bona bakhambe, ngombana bebangafuni abantu abanzima nanyana ama-coloured bona bahlale eduze kwedorobheni.
Lokho khange mina kungibambe, ngombana ngeskhatheso besele ngitjhadile, ngihlala nobabakwami. Kodwana kwaba budisi kumma. Kwatlhogeka bona ayokuhlala kude nemsebenzinakhe, begodu bekumthatha amakhambo amathathu ngebhesi, ebekutjho bona kutlhogeka akhambe ama iri ukuya nokubuya emsebenzinakhe malanga woke.
Translated by Busisiwe Prudance Skhosana