I-50 Cents Ngelanga
Ababelethi bami bebangangiphi imali, lokha nasihlala e Athlone gade ngikhamba ehlathini lokha nangiya esikolweni. Ngelinye ilanga, umma wekhuwa owondileko wangibizela emzini omunye ogade useduze nehlathelo. 'Yeyi mntazana omncani, izapha,' watjho njalo. 'Ngifuna ukukhuluma nawe.
'Gade abonakala anobungani begodu anerhuluphelo, njeke ngaya kuye. Wathi kimi ufuna bona ngimusebenzele, ngimkorobhele bengifake nephoritjhi isitupe sakhe eside esibovu ngimhlanzele nezambatho zakhe ngesibha esihlaza kwesibhakabhaka abantu egade basisebenzisa ngamalanga layo.
Gade kusisibha eside sestina, esinombala omhlophe nokuhlaza kwesibhakabhaka, angisakhumbuli ibizo laso. Ukusukela lapho, gade ngiya emzinakhe amalanga amabili ukuya kwamathathu ngeveke. Gade angibhadela i-50 cents ngingithenga ngayo iswigiri, ikofi, itiye, noburotho.
Lokha ababelethi bami bangibona ngiza ekhaya nezintwezi, bangibuza, 'uzithethephi intwezi zoke nje?' Ngavela ngathi ngiziphe likhuwa. Ngangiwuthanda umsebenzi lo, ngombana ekhethu gade sitlhaga, njeke imali leyo yarhelebha bona ubujamo bube bhedere. Kodwana nasele sikhuluma iqiniso bebungasibhedere, ngombana ngangingayi esikolweni, njeke bengingafundi izinto engizitlhogela ikusasa lami. Ngeskhatheso ngangingakwazi lokho.
Umma wahlongakala ngisesemncani ngisemabangeni aphasi. Udadwethu omdala, uPatience Nomabhulu, wafana nomma kimi, njeke ukubhubha kwakamma khange kubonakale kuyinto embi khulu.
Kodwana kwathi lokha ngineminyaka eyi-14 namtjhana-15 ngenza ibanga lesihlanu esele libizwa-Grade seven, ngalisa ukuya esikolweni. Kunalokho ngaya emakhabo labangani bami lapha sasihlala khona ilanga loke siqoqa sihleka. Kade kumsulwa begodu gade singanawo amasokana, bese sizithabisa kwaphela, kodwana singayi eskolweni.
Translated by Busisiwe Prudance Skhosana