Disente tše 50 ka letšatši
Batswadi ba ka ba be ba sa mphe tšhelete gomme ge re be re dula Athlone ke be ke swanetše go sepela gare ga sethokgwa go ya sekolong. Ka letšatši le lengwe, mosadi wo mosese wa lekgowa o ile a mpitša mo dintlong tša mo thoko ga sethokgwa. 'Hey, mosetsana nnyana, e tla mo,' a realo. 'ke nyaka go bolela le wena.' O be a bontšha a le botho gomme ke be ke duma go tseba gore o nyakang, e be ke ya go yena.
E be a re o nyaka gore ke mo šomele, ke mo hlatšwetše e be ke tlole poletšhe mo stoepong sa gagwe se se telele se hubedu. Go hlatšwa diaparo ka sesepa se se tala seo batho ba be ba se šomiša ka di nako tšela. E be e le sesepa se se telele sa mmala yo tala le bošweu, ga ke gopele leina la sona.
Go tloga letšatšing leo ke ile ka thoma ya ntlong ya gagwe ga bedi goba ga rareo mo bekeng. Ke be ke gola (50 cents) ka letšatši. Dilo di be di se botse ka matšatšing ao: ka di (50 cents) tšeo ke be ke kgona go reka swikiri, kofi le borotho. Ge batswadi ba ka ba mpona ke tla gae le dilo tšeo, ba be ba botšiša, 'O hweditše kae dilo tše kamoka?' ke be ke no re, 'Mosadi wa lekgowa o mphile.' Ke be ke rata go ba le mošomo yo ka gobane ka gae re be se na dilo tše lekanego, bjalo tšhelete ye e be e thuša.
E fela bonnete ke gore, dilo di be di se kaone, ka gobane ke be ke palelwa ke go ya sekolong. Ke be ke sa ithutele dilo tša bokamoso bja ka. Ka nako yela, ke be ke sa tsebe se. Mme wa ka o ile a hwa ge ke be ke sa le yo monyane, ke be ke sa le sekolong sa tlase. Kgatšedi waka Patience Nomabhulu, o be a le mme waka, bjalo lehu la mme waka le be le se šoro.
E fela ge ke be ke na le mengwaga ye lesomepedi nne goba hlano gomme ke dira ngwaga wa bo hlano sekolong, blale e bitšwa mphato wa bo šupa, ke ile ka tlogela sekolo. Ke be ke rata go ya le gae la bagwera ba ka ke phela letšatši kamoka le bona, re dira metlae. Go be go se na molato. Go be go se na masogana, re be re no ipshina. E fela re be re sa ye sekolong.
Translated by Lebogang Sewela