50 Cents Ka Letsatsi
Batsadi ba me ne ba sa mphe madi, mme fa re ne re dula kwa Athlone ke ne ke tshwanetse go gara sekgwa gore ke fitlhe kwa sekolong. Tsatsi lengwe, mosadi o mosesane wa mosweu o ne a mpitsa gotswa mo nngweng ya matlo a a okameng sekgwa. 'Hey, mosetsanyana, tlaya kwano', o ne a bua. 'Ke batla go bua le wena.' O ne a lebega a le botsalano mme ke ne ke eletsa go mo reetsa, ka jalo ke ne ka ya kwa go ena.
O ne are o batla gore ke mo direle, ke tlhatswe le go pholitšha setupu sa gagwe se se telele se se hibidu, le go tlhatswa diaparo ka sesepa sa mmala wa loapi se batho ba neng ba se dirisa ka malatsi ao. E ne ele sesepa se se telele, sa mmala wa loapi le bosweu; ga ke gopole leina la sona.
Go tloga ka motsi oo, ke ne ke ya kwa ga gagwe gabedi kgotsa gararo ka beke. Ke ne ke duelwa 50 cents ka letsatsi. Dilo di ne di sa bitse ka malatsi ao: ka 50 cents eo ke ne ke kgona go reka sukiri, kofi, teye le senkgwe. Fa batsadi ba me ba mpona ke tla gae ka dilo tseo, ba ne ba mpotsa, 'O bone kae tseno tsotlhe?' Mme ke ne kere, 'Mosadi wa mosweu o nneile tsona.' Ke ne ke rata go nna le tiro enô ka gonne kwa gae re ne re sa itsholela, ka jalo madi a kaonafaditse dilo go nna.
Fela mo bonneteng go ne go se botoka, ka gonne ke ne ke sa ye sekolong, ka jalo ke ne ke sa ithute dilo tse bokamoso jwa me bo di tlhokang. Ka nako eo, ke ne ke sa itse seno. Mmê wa me o tlhokafetse ke santse ke le monnye, ke le kwa sekolong se se potlana.
Kgaitsediaka yo mogolo, Patience Nomabhulu, o ne a fetoga mmê go nna, ka jalo loso lwa mmê le ne le sa bonagale ele selo se se bosula jalo. Fela fa ke ne ke le dingwaga di le 14 kgotsa 15, mo Mophathong wa Botlhano, o ga jaana eleng Grata ya Bosupa, ke ne ka emisa go ya sekolong.
Mo boemong jwa seo, ke ne ke ya kwa matlong a ditsala tsa me gore re tlhole tsatsi lotlhe re tlotla le go dira metlae. Go ne go sena selabê. Go ne go sena bakapelo mme re ne re ijela fela monate. Fela re ne re sa ye sekolong.
Translated by Nchema Rapoo