Emakhaya Asebuntfwaneni
Sahamba saya eEastern Cape kuyofuna Felicia Mfamana siyobona lendzawo lapho khona liningi lalabogogo be GAPA (Bogogo lebe Balwa Nebuphuya ne Mbulalave) bakhulela khona. lamalungiselelo kwakukutsi Felicia utohlangana natsi ngaphandle kwelibhange le ABSA eceleni kwalapho kungenwa ngakhona kulesigodzi se Cofimvaba.
Satsi nasifika, sabona lokuncane, intfo lemile ngaphandle kwalelibhange. Nasikhashane, kwakubonakala kukuncane kakhulu futsi kwakulungela kuba ngumunye walabogogo. Kepha loyo wesifazane bekagcoke lokusasigcoko lesinetinwele letilulkhwebeleti sasivame kubona Felicia agcoke loko futsi, ngeliciniso, kwakunguye vele.
ʹMaye, ngijabulile nifikile,ʹ washo njalo, wase uyasetfula kumakhelwane nasendlula. Sashayela imotolo yetfu lebesiyibolekile, indlela lendze lenetigodzi kulendzawo lapho ahlala khona.
Yindzawo nje lapho bantfu bakhona bangeke sebakhone kuyofika khona ngemaSontfo, uma ematekisi angahambi, noma ngesikhatsi sekuna kwelitulu. Lekhaya lemadloti akubo, Felicia unembono lomuhle lapho khona sigodzi sakhe setsembele.
Indlu yakhe isentsabeni, letindzawo tetjani tehlela kancane phansi. Nawukhashane ngemahlatsi lapho khona indvodzakati yakhe Nomanani atfota khona tinkhuni njalo ngeliviki, abuye nenyandza ayetfwele enhloko, bese ngasemaceleni khashanyana kunetintsaba.
Ngasekhaya lakhe kunetindlu tesiguco tesigodzi sakhe, letipendwe ngelibala leluhlata sasibhakabhaka, pinku kanye namtfubi, leyo mibala legcwele yonkhe indzawo yesigodzi sase Eastern Cape.
Kunekuthula ngaphandle kwemsindvo wetinyoni etjanini, enemoya loshaya kancane, futsi ngenjwayelo, kubingelela kwabomakhelwane labendlulako. Letindzawo tiyamangalisa, kepha laba baka Mfamana, njengalabanye labaningi eEastern Cape, bahluphekile kakhulu.
Kuhlephula Emkhatsini wemaKhaya
Felicia unemndeni eKapa, kanjalo nalona munye lana kulesigodzi, lawusita kutsi ukhule. Uhlephuleke emkhatsini wawo yomibili. Lendzawo yase Khayelitsha lapho ahlala khona kuhlushekiwe, sitaladi sakhe sigcwele tindlu, kantsi kukhona nebugebebgu, usho njalo.
Inhlitiyo yakhe ikulesigodzi sakubo, kepha labantfwana labaseKapa bayamudzinga, nabo. Muva, samutsatsa wayobona dzadzewabo esigodzini lesingumakhelwane. Yatsi lapho imoto yetfu seyingasakhoni kuchubeka kulendlela, samehlisa. ʹKulungile, akusiko khashane,ʹ wasitjela kanjalo, buso bakhe babujabulile njengemihla yonkhe.
Samubuka asahamba ehlela entsabeni, akhuphuka nalenye, aphangisa futsi ajakile, ngendlela lefanako lenemndlandla nemandla, nekutibamba saba nekukutayela loko. Bekanendlela yekuhamba, kepha njengendlela kuba yincane ngelibanga sisengakhona kuchubeka, sibonga lesigcoko setinwele takhe letilukhwebeleti.
Translated by Phindile Malotana