Legae la ka, nako ye ke be ke sa gola
Re ile ra tšea leeto la go ya We Eastern Cape go ya go hwetša Felicia Mfamana, go bona lefelo leo Bokoko ba GAPA (Grandmothers Against Poverty and Aids) leo ba goletšego go lona. Peakanyo e be e le gore re tla kopana ka ntle ga panka ya ABSA kgaušwi le kgorong ya motse wa Cofimvaba.
Ge re fihla re ile ra bona sebopego se se nnyane se se telele ka ntle ga panka. Kgole nnyana sebopego sa gona se be se bontšha se le se se nnyane gore e ka ba yo mongwe wa Bokoko. E fela mosadi wa gona o be a apere berethe e purapura re be re hlwa re bona Felicia a e apere. Ka nnete e be e le yena.
'Oh, ke itumetše gore o tlile,' o rile bjalo, a myemyela gomme a re tsebiša go moagišane yo a bego a duma go tseba ge a feta. Re ile ra otlela koloi ya rena yeo re e hirelego go ya motseng wo a dulago gona. Ke lefelo la kgakala, ga go kgonege go ya ka Lamorena, ge diteksi di sa sepele goba ka sehla sa pula.
Go tloga mo le gae la lapa la gagwe, Felicia o na le ponagalo ye botse ya motse mo go na lego motse wa gagwe. Ntlo ya gagwe e mo thabeng, bjang bo theogela fase ka mokgwa wa boleta. Kgole nnyana go na le sethokgwa fao morwedi wa gagwe, Nomanani a kgoboketšago digong beke ye nngwe le ye nngwe.
Ge a fetša e be a tliša ngata ka gae a e rwele godimo ga hlogo. Ka mošolo wa fao ke dithaba. Ka go dikologa ga lapa la gagwe go na le rondavels tša motse, tšeo di petilwego ka mebela ye turquoise, pinki le serolwane, mebela ye tlwaeleggilego mo Eastern Cape. Ke lefelo la go thola kantle le medumo ya dinonyana mo bjang, moya, ka nako ye nngwe o na le go kwa baagišane ba dumediša ge ba feta. Lefelo le botse, eupša Mfamanas, mo Eastern Cape, ba hlaka.
Kgetho gare ga magae a mabedi
Felicia o na le lapa mo Cape Town, gape o na le lapa le lengwe mo motseng, go thuša ka go godiša. O pharogile gare ga mafelo a mabedi. Karolo ya Khayelitsha moo a dulago gona go a diila, ditsela tša gona di tletše ka dintlu gomme bosenyi ke bo bontši. Pelo ya gagwe e mo motseng wa gagwe, eupša bana ba gagwe ba mo hloka mo Cape Town.
Morago ga nako re ile ra mo iša go ya go bona kgaetšedi ya gagwe mo motseng yo mongwe. Ge koloi ya rena e sa kgone go tšwelela pele mo tseleng ye thata, re be re mo fološa. 'Go lokile, ga se kgole,' o rile bjalo, sefahlego sa gagwe se be se phadima.
Re be re mo lebeletše ge a theoga ka thaba, a sepela ka lebelo ka boitlamo, ka boitshwaro bja gagwe bjo bose, bjo re bo tlwaetšego. O be sa na le tsele ye telele, eupša sebopego sa gagawe se ile sa hunyela le tsela, re be re sa mmona ga nnyane, re lebogela berethe ya gagwe ye purapura.
Translated by Lebogang Sewela