Go Nganga Tšhelete
Re hwetša tšhelete ya lapa go tšwa mogolong wa ka, wa phenšene, e tee ke phenšene ya nngwana, tše dinngwe ke tša mphiwafela. Ka beke ya mathomo ya kgwedi, ke reka reise, Weet-Bix, bupi, swikiri le dilo kamoka tše bana ba di hlokago, tša sekolo.
Ka beke ya bobedi ga re sa na tšhelete e setšego. E be re ya go adima R200 goba ya go feta mo, go mogwera waka. Ge e fela re thoma go adima gape. Ge ke hwetša tšhelete ya phenšene, ke swanetše go lefa di koloto kamoka. Bana ba ka ba bantši ba be ba ya go dula mo Transkei ge ba godile.
Ngwana yo mo tee yo a phetšego botse, Sakhumzi, ke morutiši gomme o be a thuša dikgatšedi tša gagwe ka tšhelete ka gobane ba be ba sa kgone go hwetša mošomo mo Transkei goba mo Cape Town. Lenna ke ba romela tšhelete go tšwa phenšeneng ya ka. Setlogolo sa ka sa mosetsana, Sesethu, o dula le nna mo Cape Town, o na le mengwaga ye masomepedi tee gomme o ithutela mo toropong ya Pentech. Se, se nthabiša kudu.
O be a na le mošomo ngwaga o fetilego wa go boledišana le batho ka tekolo ya mmušo gomme ba ile ba mo lefa, e fela ke be ke sa nyake go šomiša tšhelete yeo a e šometšego ka gobane o be a e hlokela dithuto tša gagwe. Ga ke tsebe gabotse gore o ithutela eng. Ga ke kwešiši. Seo ke se tsebago ke gore o dira seo a nyakago go se dira, e bile ke nthwe botse.
Leano La Eastern Cape
Ga ke nyake go dula mo Cape Town. Ke nyaka go boela Eastern Cape ka gobane ke lefelo la botswalo bja ka, fao tate wa ka a bego a dula gona. E fela rondavel yeo tate waka a e agilego, yeo ke goletšego go yona e ya senyega. Re ka se kgone go dula go yona. Re dula le baagišane ba rena, mo tlong ya ba bangwe ba leloko la rena, ge re sa emetše go re ba lokiše ntlo ya rena.
Nomanani, kgaetšedi waka yo mogolo, yo a dulago fao, o lokela lefase le le bose gomme rena le nyaka go lokela mafastere a magolo le lemati le le mpsa ka gobane lemati la gona le senyegile. Re nyaka gape le go aga ntlo ya ditena go tloša moago wo sekamego pele ga rondavel ya rena.
Morwa waka, Sakhumzi, yo a lego morutiši, o rile o tla e aga. O rekile ditena, di gona mo tšhemong ya ka. Re emetše fela go bona gore o tlo aga neng. Napila re tla ba le sekgoba se se lekanego gore lapa kamoka le kgone go dula ge ba ya ka maikhutšo..
Nomanani o nyaka gore ke boele go ya go dula mo Eastern Cape, ka gobane ge ke le moo, ke tla kgona go hlokomela barwa ba babedi ba gagwe, yena a kgone go yo nyaka mošomo kua Queenstown, gona ga se kgole. E fela ditlogolo tša ka tše dingwe di mo Cape Town, ba ka se boele Eastern Cape go ya go ile. O a tseba gore batho ba bjang. Ba nyaka go ba mo toropong, ka gobane go na le mešomo e bile ba ka kgona go ipšina.
Translated by Lebogang Sewela