Ho Otlolla Tjhelete
Tjhelete ya lelapa la rona e tswa ho penshene ya ka, thuso e le nngwe ya tshehetso ya bana le mekgatlo e mmedi ya tlhokomelo ya bana. Beke ya pele ya kgwedi ke reka raese, Weet-Bix, phofo, tswekere le ntho e nngwe le e nngwe eo bana ba e hlokang sekolong; ka beke ya bobedi ha ho na tjhelete e setseng.
Re ye re adima R200 kapa ho motswalle wa rona mme ha e fedile, ho adima ho qala hape. Jwale re tlameha ho e lefa ha penshene e fihla. Bongata ba bana ba ka ba ile ba dula Transkei ka mora hore ba hole. Mora wa ka ya pholohileng, Sakhumzi, eo e leng tichere, o thusa baradibabo ka tjhelete hobane ba sa fumane mosebetsi Transkei kapa Motse Kapa. Ke boetse ke ba romella tjhelete ya ka ya penshene.
Setloholo sa ka Sesethu, e mong wa ditloholo tse dulang le nna Motse Kapa, o dilemo tse 21 mme o ithuta Pentech motseng oo. Ke thabile haholo ka seo. O ne a ena le mosebetsi wa ho buisana le batho bakeng sa palo ya sechaba selemong se fetileng mme o ile a lefellwa bakeng sa yona, empa ke ne ke sa batle tjhelete leha e le efe eo a e fumaneng hobane a e hloka bakeng sa dithuto tsa hae.
Ha ke tsebe seo a ithutang sona, hantle. Ha ke utlwisise seo. Seo ke se tsebang ke hore o etsa seo a batlang ho se etsa, mme seo se molemo.
Merero ya Kapa Botjhabela
Ha ke batle ho dula Motse Kapa. Ke batla ho kgutlela Kapa Botjhabela hobane ke sebaka sa semelo sa ka, moo Ntate a neng a dula teng. Empa rontabole eo ntate wa ka a hahileng, eo ke hotseng ho yona, e wele fatshe. Re ke ke ra phela ho yona. Re dula haufi le ntlo ya beng ka rona, ha re ntse re e lokisa.
Nomanani, moradi wa ka e moholo, ya dulang moo, o beha mokatong o nepahetseng mme re rera ho kenya difensetere tse kgolo le monyako o mocha, hobane monyako wa rona o robehile. Hape re rera ho haha ntlo e ntle ya ditena ho nka sebaka sa mohaho o nang le tshepe o haufi le rona.
Mora wa ka, Sakhumzi, tichere, o itse o tla e haha. O rekile ditena mme di teng ka jareteng. Re ntse re emetse ho bona ha a ka etsa mohaho. Jwale re tla ba le sebaka se lekaneng sa hore lelapa lohle le dule ha ba le ya teng ka matsatsi a phomolo.
Nomanani o batla hore ke kgutlele ho ya Kapa Botjhabela, hobane jwale ke kgona ho hlokomela bara ba hae ba babedi mme a ka batla mosebetsi Queenstown, o seng o le hole haholo. Empa ditloholo tse ding tsa ka di Motse Kapa mme di ke ke tsa kgutlela ho ya Kapa Botjhabela ho tla ba molemo.
O tseba seo bacha ba leng sona. Ba batla ho ba motseng, hobane ke moo mesebetsi e leng teng, mme ke moo ba ithabisang teng.
Translated by Bongani Matabane