Go Dira Mo Thotobolong
Diaparo tsa bogologolo, dikgetsana tsa marekelo tsa polasetiki, dijo tse di bodileng, dikgogo tse di bodileng, merogo, tota le ntša e e bodileng ka nako nngwe – tsotlhe di ne di patagantswe mo thotobolong e kgolo ya thabana e e borokwa, e atologetse kwa bokgakaleng jo re ka bo bonang. Go tswa kgakala, o ne o ka utlwa monkgo wa yona.
Ka tsatsi leo lantlha, ke tsamaya mo thotobolong le basadi ba bangwe, ke ne ka lwala tsatsi lotlhe, monkgo wa teng o ne o le bosula. Dingwaga di le 10, go tloga ka 1972 go fitlha ka 1982, re ne re dira mo thotobolong eo. Tiro ya rona e ne e le go topa mabotlolo a a thubegileng, dikhatebôte le dipolasetiki mme re di rekise tsotlhe gore di diriswe gape go monna wa moIndia yo o neng a bitswa Rre Faro, yo o neng a letile kwa letlhakoreng la thotobolo.
Ka tsatsi le le siameng ke ne ke dira R30. Ke ne ke gona go reka senkgwe, parafene – e ne e ja penny e le nngwe – reisi le mmidi. Mo malatsing a mangwe re ne re dira fela madi a a lekaneng go reka kgetsana e le nngwe ya reisi. Go ne go sena nama kgotsa merogo, go ne go sena madi a tseo. Fa ke sa ye kwa thotobolong, re ne re sa nne le dijo.
Le ka mafêlô a beke tota, fa ke ne ke sa ye, re ne re sena sepe se re ka sejang. Fa o na le bana, ba phela ba tlhoka dijo. Mme o tshwanetse ke go ya go reka senkgwe le sengwe le sengwe gape gape. Basadi bangwe ba ne ba tsaya dijo tse ba di fitlhelang mo thotobolong go di isa kwa malapeng a bona, fela ke ne ke ka se dire jalo, le eseng.
Bokgoni
Tsatsi lengwe ke ne ka bona batho ba sela diaparo mo thotobolong, mme le nna ke ne ka simolola go dira jalo. Go simolola ka motsi oo, bana botlhe ba me ba ne ba apara diaparo tse ke di boneng mo matlakaleng. Re ne re di tsaya le go di tlhatswa. Fa setlogolo sa me Nosanelisiwe a belegwa, ke ne ebile ka bona kgetse e e tletseng ka mengato ya letsela mo thotobolong, ke ne ka e tlhwatswa gore re mo apese yona.
Nako dingwe batho basweu ba ne ba tsenya dilo tse di ntle tseno mo dikgetseng tse di phepa tse ntsho, mme re ne re di fitlhela di le jalo, dikobô le mesamo tota le dijana, di phuthetswe sentle. Ke ipotsa gore ke goreng ba ne ba latlha dilo tseo, ka gonne e ne e le dilo tse di siameng. Re ne re na le bonnye, fela ke ne ke na le diaparo di le di ntsi, tse ke di boneng mo thotobolong, mme re ne re apara jaaka makgarebe, waitse. Fa re dira mo thotobolong, ga ise nke re lwane, re ne re tshega ka metlha.
Mongwe o ne a bua se, mme yo mongwe a bue sele, mme re tshege. Mongwe o ne a ka topa sengwe, gongwe diaparo, mme are, ‘Mohumagadi Skefile, itseele seno.’ Go ne go le gontle, le fa lefelo le ne le nkga. O tshwanetse go ipela fa o sena sepe, mme o dirisa se Modimo a go neelang sona.
Translated by Nchema Rapoo