Ukusebenza Enzibini
Izambatho ezidala, amatjhwaratjhwara, ukudla okubolileko, iinkukhu ezibolileko, imirorho, ngesinye isikhathi ngitjho nenja ebolileko –zoke zipakelene entabeni ekulu yenzibi, efika kude la amehlo aphelela khona. Bewuzizwa zinuka kude le. Ngelanga lokuthoma, ngifika enzibini napho nabanye abafazi, ngazizwa ngigula,kwakunuka kumbi khulu. Ngasebenza enzibinezi iminyaka elisumi,kusukela ngonyaka ka-1972 kuya kowaka -1982.
Umsebenzethu kwakukudobha amabhodlelo aphukileko, amakhadibhokisi, iintjhwaratjhwara, siwathengisele indoda yendiya ebizwa bona nguMnuzana uFaro bona enze ngazo umkhiqizo omutjha/-recycle bekasilinda ekugcineni kwezalelo. Nangisebenze kuhle langelo ngangirhola –R30. Bengirhona ukuthenga i-Paraffin ebeyingibiza ipeni, ireyisi, nepuphu.
Ngamanye amalanga besithola imali eyanela bona sithenge ipaka yinye yereyisi encani. Gade singabi nayo imali yokuthenga inyama nanyana imirorho. Nagade ngingakayi enzibinapho besingabi nokudla. Ngitjho nangepelaveke. Nangabe unabentwana bahlala batlhoga ukudla, kufanela bona ukhambe uyokuthenga uburotho nakho koke okutlhogako godu. Abanye abomma ebengidobha nabo, bebathatha ukudla ebakuthola enzibinapho bakuse emindenini yabo, kodwana mina, bengingakwenzi lokho, gade ngibhalelwa.
Iinsetjenziswa
Ngelinye ilanga, ngabona abantu badobha izambatho, ngathoma nami ngenza njalo. Ukusukela lapho, abentwabami gade bembatha izambatho engizidobhe enzibinapho. Besizithatha sizihlanze. Kwathi lokha umntwanomtwanami uNeliswa abelethwa, ngathola isikhwama esikhulu esizele izambatho, namadugu enzibinapho, ngazihlanza sazisebenzisela yena.
Ngesinye isikhathi amakhuwa bekafaka izambathwezi emtjhwaratjhwareni amakhulu anzima ehlanzekileko, nathi sazithola zinjalo, iingubo ngitjho nemisamelo, iinkotlela, eziphuthelwe kuhle. Bengizibuza bonyana kungebanga lani, alahla izintwezi, ngombana bezizihle. Besitlhaga, kodwana benginezambatho ezinengi, ngitjho lezi ebengizidobhileko begodu besimbatha njengabantazana uyazi. Lokha nasisebenza enzibini, besingalwi besihlala sihleka
. Omunye bekatjho lokhu, kuthi omunye naye atjho lokhu, bese siyahleka. Omunye bekadobha into ethile, mhlambe izambatho, athi ‘Mam uSkefile thatha into nasi ngeyakho’. Lokho bekukarisa nanyana bekunuka nje. Kufanele bona uzazise nanyana unganalitho, begodu usebenzisa lokhu uZimu akuphe khona.
Translated by Busisiwe Skhosana