Ukuba duze Nomndeni
Nginomzwami eKhayelitjha. Ekuthomeni gade siqatjha e-City Council, basinikela ngonyaka ka-1985.Kodwana isikhathi esinengi ngiya kundodakazi yami uZodwa kanye nabantwabakhe emkhukhwinakhe eGrassy Park.
Ngombana uZodwa ungifuna eduze kwakhe.Kufanele ngibe lapho, ngombana esikhathini esinengi kubudisi kobana ngikhambe nanyana ngivuke, ngombana iinyawo zami zibuhlungu ngobulwelwe bamathambo. Imali siyithola ngomndende wakarhulumende, nale encani engiyenza ngokuthungela ihlangano ye-GAPA, neyomndende kaZodwa yoburhole.
Akarhoni ukukhuluma lula ngombana ilimi lakhe lingakatjhaphuluki.Lihlangene nalokhu kwangaphasi kwemlonyeni. Begodu watjha kumbi, lokha asesemncani, lokha ubabawakwami asese lipholisa, wathelwa mamanzi abilako.
UZodwa gade afuna ukubamongikazi. Unerhono lokutlhogomela abentwana, begodu unanerhono lokutlhogomela abanye abantu abatlhagako. Kodwana akhange arhone ukubamongikazi begodu into emthabisako kwanjesi uthi kukuba nomndenakhe.
Iindleko Zepilo
Izinto zijame kuhle kwanjesi kimi, ngombana iinzukulwani zami uLuyanda no Zanele bahlala nami, ukubatlhogomela kuyangithabisa. Angithandi bona baye e-after care, ngombana bagongobala iinyawo lapho begodu babuya ekhaya baphethwe mathumbu, begodu bakguda.
Kubhedere bonyana bahlale nami lapha.Ngenza isiqiniseko bona bazilungiselela ukuya eskolweni babambe ibhesi nge iri lekhomba. Boke basuka kwami eKhayelitjha baye eMitchells Plain. Kukude kodwana bayaya ngombana iinkolo zibhedere lapho.
Ibhesi isibiza R72,50 umntwana munye ngeveke, begodu sibhadalela babili, njeke yimali enengi. Inyanga le, kutlhogeke bona bahlale ekhaya iveke ngombana besingana mali yokobana babhadale ibhesi. Ngibazwela ubuhlungu ngalokho, ngombana ngeze barage kuhle emfundweni zabo. Ngifuna bona bafunde, bafunde khulu. Bangatlhagi njengombana bengitlhaga.
Ngifuna bona baye eskolweni, bafike emabangeni aphezulu kunewami, ngombana ngibe nesikhathi esibudisi. Khange khesizwe abotitjhere babalabala, kodwana sisengakaboni amarepoti wabo. Ngeze basinikele amarepoti singakabhadali imali yeskolo/-school fees. Kodwana i-school fees sibiza R400 unyaka woke umntwana munye. Khange khesisibhadale ngombana asinamali.
Imidlalo Yokuhleka
Lokha iinkhathi zizidle, sidla ireyisi nenyama yekomo nanyana yekuku, namtjhana ifesi namatjhipsi. Lokha nazizimbi, sidla umratha kwaphela. Ngesinye isikhathi asinalitho, ngesinye isikhathi abomakhelwani bethu basikgelebha ngokusipha ipuphu yomratha nanyana ireyisi, begodu nathi senza njalo.
Umzukulwanami uZimi akahlali nathi, kodwana uyezwa kimi nakuphuma isikolo, njeke ngitlhogomela abentwana abathathu. Sidlala imidlalo eminengi begodu benza izinto ezingihlekisako.
Ngesinye isikhathi sidlala umabhaqelana, ngifihla into efana nebhande lami, ngibatjele bona balizume. Ngelinye ilanga, umdlalo wawuthi nabangalithola ibhandelo bangibethe ngalo. 'Ningangibetha', ngabatjela njalo, kodwana ngangidlala, soke sahleka.
Umndeni ka Felicia Mfamana’s
Besihlala emkhukhwini iminyaka eminengi, lokha iz ilu nalinako, amanzi gade angena ngemaboda. Indawethu yayizala amanzi.Sisifuna ukuthola indlu, ngayi aplayela, ngayilinda.
Nyakanonyaka lokha nasibuzako, bekubazinthembiso, phezu kwenthembiso. Kwathatha iminyaka eyi-24, bona ekugcineni sithole indlu ehle le, eKhayelitjha.Sinendlu enamakamero amabili, anemibhede emibili ngaphakathi kwekumba yinye, nemikhukhu emibili ngemva kwendlu, lapha amasokana womndeni lo bekahlala khona. Sele siphelele siyi -11.
Translated by Busisiwe Skhosana