Ho sebetsana le Thothobolo
Diaparo tsa kgale, mekotla ya polasetiki, dijo tse bodileng, dikgoho tse bodileng, meroho, esita le ka dinako tse ding ntja e bodileng e ne e pota-potilwe thabeng e kgolo e tala ya ho lahlela, ho fihlela moo re ka bonang teng. Ho tloha hole, o ka e fofonela. Letsatsing leo la pele, ke ntse ke tsamaya le basadi ba bang, ke ne ke kula letsatsi lohle, monko o ne o le mobe haholo.
Ka dilemo tse leshome, ho tloha ka 1972 ho fihlela ka 1982, re ile ra sebetsa tshebetsong eo. Mosebetsi wa rona e ne e le ho nka dibotlolo tse pshatlehileng, mabokoso le polasetiki le ho di rekisa kaofela bakeng sa ho kgutlisetswa hape ho monna ow Moindia ya bitswang Monghadi Faro, ya neng a emetse pheletsong ya taolo. Ka letsatsi le monate ke entse R30.
Ke ne nka kgona ho reka bohobe, parafine - e ne e hloka tjhelete e le nngwe ya raese le ya phofo. Ka matsatsi a mang re ne re etsa tjhelete e lekaneng ho reka pakete e le nngwe ya raese. Ho ne ho se mohla wa nama kapa meroho, ho se na tjhelete bakeng sa seo. Haeba ke ne ke sa ee thothobolong, re ne re se na dijo.
Esita le mafelo-beke, haeba ke sa tsamaye, re ne re se na letho la ho ja. Haeba o na le bana, ba ntse ba hloka dijo. Jwale o tlameha ho ya ho reka bohobe le ntho e nngwe le e nngwe hape. Basadi ba bang ba ile ba nka dijo tseo ba di fumaneng ha ba kgutlela malapeng a bona, empa ha ho mohla nkileng ka etsa jwalo.
Ho Sebetsana le Maemo a sa Tshwaneng
Ka letsatsi le leng ke ile ka bona batho ba ntse ba nka diaparo tse lahlilweng, yaba ke qala ho etsa jwalo. Ho tloha ka nako eo ho ya pele, bana bohle ba ka ba ne ba apara diaparo tseo ke neng ke di fumana thothobolong. Re ile ra di nka yaba re ya di hlatswa. Ha setloholo sa ka Nosanelisiwe se tswalwa, ke ile ka ba ka fumana mokotla o moholo o tletseng maleiri a lesela, mme ka wa hlatswa e le hore re wa sebedise.
Ka dinako tse ding batho ba makgowa ba kenya dintho tsena ka mokotleng o motle, o hlwekileng, mme re ba fumana ba tshwere dikobo le mesamo le dijana, di phuthetswe hantle. Kea ipotsa hore na ke hobaneng ha ba lahla dintho tseo, hobane e ne e le dintho tse ntle. Re ne re ena le ho honyane haholo, empa ke ne ke ena le diaparo tse ngata, tseo ke di fumaneng tshebetsong, mme re apere jwaloka mafumahadi, wa tseba.
Ho sebetsa mosebetsing, ha rea ka ra lwana, re ne re dula re tsheha. E mong o ne a ka re ntho ena, e nngwe le e nngwe, ebe re tsheha. E mong o ne a tla nka ntho e itseng, mohlomong diphahlo tse ding, ebe o re, 'Mofumahadi Skefile, nka ntho ena.' Seo se ne se hlolla, le hoja sebaka seo se ne se nkga. O lokela ho ikgohomosa ha o se na letho, mme o sebedisa seo Modimo ao fang sona.
Translated by Bongani Matabane