Tladi gotswa Loaping
Tsatsi lengwe, ke romile morwa wa me o monnye, Phumie, kwa lebenkeleng go reka senkgwe le sukiri. Fa a boela morago a kgabaganya mo tlhageng e telele, pula e ne ya simolola go na. Ka pejana, go ne ga nna le matlakadibe. O ne a rathwa ke tladi. O ne a le dingwaga di le 18.
Batho ba ne ba tabogela kwa ntlong ya me morago ga fao bare ba mmone a taboga, mme ba mmona a wela fatshe. 'Oh Goldie, ke maswabi', ba ne ba bua. 'O fale, mo thabaneng.' Fa re fitlha kwa go ênê, o ne a setse a tlhokafetse. A ka tswa a tlhokafetse ka gangwe. Go phela go na le kotsi ya go rathwa ke tladi ka selemo kwa Kapa Botlhaba.
Le ga jaana, fa ke ne ke boetse teng ka Mopitlwe, ke utlwile gore seno se diragaletse batho ba le mmalwa. Ke selo se re tshelang ka sona. Fela ga o ka ke wa ipaakanyetsa seo mo lolapeng lwa gago. Loso e ka tswa e le setlwaedi, fela o ka seke wa lo tlwaela.
Go Simolola Go Lora Gape
Morago ga gore ba le babedi ba bana ba me ba tlhokafale ka ntlha ya HIV/Aids, ke rile, 'Goreng e le nna, la nako tsotlhe? Goreng morago ga le dingwaga di le pedi dingwe le dingwe, mongwe wa bana ba me a tshwanetse go tlhokafala? Goreng nna?' Ke godiseditswe ka fa molaong, ke dira se se siameng ka metlha, mme ke ne ke sa kgone go bona gore ke goreng kutlôbotlhoko enô yotlhe e tshwanetse go tla kwa go nna.
Mo pelong ya me ke ne ka simolola go pega batsadi ba me molato, ka gonne ke ne ke sa batle go nyalwa kwa tshimologong. Ke ne gopotse gore ke tla nna mooki kgotsa ke rute kwa sekolong, fela monna wa me o ne a sa ntetle. Ka jalo ke ne ke akanya, 'Jaanong ke na le bana le monna yonô mme ba a tlhokafala.
Ke eng mosola wa seno sotlhe?' Le fa ke ne ke itemogela ketsaetsego enô yotlhe, ke ne ke itse gore monna wa me e ne ele monna yo o siameng. Le ênê, o ne a utlwile botlhoko gore bana ba gagwe ba a tlhokafala. Fela maso a nkamile ka maatla. Ke ne ke dula gae tsatsi lotlhe, ke dutse fela fa fatshe mme ke nagana, ke kganetswe ke kutlôbotlhoko ya me.
Ke ne ke sa kgone go nagana ka dijo. Ke ne ke sa batle go bona batho ba bangwe. Ke ne ke tlhatswa diaparo le go phepafatsa ntlo ya me le setsha, fela fa ke fetsa tiro ya me, ke ne ke tsena mo ntlong mme ke patlame. Ke ne ke itse gore tlhogo ya me e ne e sa itekanela. Ka tshoganyetso, ke ne ka lemoga fa sengwe se tshwanetse go fetoga. 'Ke dira eng, ke dutse fano ke le esi tsatsi lotlhe, ke sa dire sepe?' ke ne ka ipotsa. 'Nka se tswelele jaana. Ke tshwanetse go boela kwa Cape Town go nna le monna wa me.
Re tshwanetse go buisana le go sweetsa se re tlileng go se dira.' Ke ne ka ya le toro ya go simolola kgwebo e e leng ya me mme ke ne ka simolola go ikutlwa botoka. Ka jalo ke ne ka boela kwa Cape Town, ka kopa Otto go nthekela motšhine wa sešeng wa go roka, mme ka simolola kgwebo e ke neng ke simolotse go lora ka yona.
Go Alafega Mmogo
Mo maitseboweng a le mantsi, re ne re buisa Beibele mmogo. Kgaolo e e neng e re gomotsa thata e ne e le ya ga Moapostolo Timothy, mo a buang sengwe se se jaaka, 'Mo pakeng e telele, fa Jeso a tla, bana ba ka se utlwe. Go tlile go nna le loso lo lo golo.
Batho ba tla rata madi.' Re ne ra akanya, 'Goreng re nagana dilo tse di maswe tseno fa Modimo a re neile Beilbele, e e seng buka e e jaaka tse dingwe? E kwadile ke baporofeta. Mme dilo tsotlhe tse di diragalang di kwadilwe mo Beibeleng.' Re ne ra simolola go ikutlwa re itumetse. Ke ne ka tswelela ka go roka le go loga. Kutlôbotlhoko ya me ya ela tlase.
Translated by Nchema Rapoo