'Modimo leoto la me, Phyllis leoto le lengwe'
Fa morwadiaka Phyllis a tlhokafala ga ke itse gore ke tlile go siama gape. Okare Modimo ke leoto la me mme Phyllis ke leoto le lengwe. E ne ele Phyllis yo o nthusitseng go aga ntlo ya me, mme o ntheketse setofo fa a ne a dira, mme gape dithaele tsa ntlo ya me, le ditlabakelo tsa phaposi ya go tlhapela tse re iseng re di lokele.
Dibeke di le mmalwa tse di fetileng Phyllis o tlile gae kwa ntlong ya me go tla go tlhokafala. O ne are se a se batlang fela ke go nna le mmê wa gagwe. Ke ntse ke mo jesa, ke mo tlhapisa, ke mo gomotsa, ke mo tlhokometse ka nako tsotlhe. Ebile o ne a robala mo bolaong jwa me le nna. Go ne go le thata mo go nna go ka tswa ka ntlo, ka ge a ka tlhoga a tlhoka sengwe.
O ntse a bua selo se le sengwe gantsintsi: 'Ke tsela e telele, mama, mme ke tshwanetse go e tsamaya ke le nosi, fela ke ipaakanyeditse go tlhokafala jaanong. Ke amogetse ka gonne ga go sa tlhole gona le sepe se se ntsamaelang sentle. Se ke tshwenyegileng ka sona fela ke wena.
O kgotlhelela jang? Madi a go mpoloka a tlile go tswa kae?' Ke mmone a ntebile fa a ne a akanya gore ga ke lemoge, keledi e elela mo lerameng la gagwe, mme ke a itse o tshwenyegile ka nna gape. Ke akanya gore o itshwareletse mo go tsheleng ka ntlha ya me. Seno gase a mo siamela. Mme mo go nna, ga jaana ke go gontsi.
Go Batla Thuso Gotswa Ditsaleng
Ke ile kwa go bonkoko ba bangwe, ditsala tsa me tse di gaufi, mme ka ba kopa gore ba bue le Phyllis ba mmolelele gore a ye kwa bookelong go ya go tlhokafalela teng, ka gonne ka tsela e dilo di neng di le ka teng, go ne go nkutlwisa botlhoko mme ke ne ke sa kgone. Ba nthusitse. Ba mo tlhaloseditse, mme o ne a ya kwa bookelong.
Nako nngwe le nngwe e a neng a lwala ka yona mo malobeng, ke ne ke ikutlwa thata ke le monosi, ke akanya gore go tlile go nna jang fa a tsamaya. Fela ga jaana, baagisani ba setse ba tla fa go nna, ba bua le nna ka ga se se diragalelang Phyllis, ba ntlisetsa dijo go nthusa. Maloko a kereke le bona ba tlile go tla phitlhong ya gagwe.
Mme jaanong, ke na le bokgaitsediaka ba GAPA. Enô ke kgang ya me ya boammaruri. Oh, ke eletsa fa mmê wa me a kabe a santse a tshela go utlwa kgang ya me. Ke tlile go e bontsha setlogolo sa me Juliette, gore a bone ka fao nkoko wa gagwe a bogileng – le ka fao, morago ga nako e yotlhe, ke leng mofenyi. Ka nnete, ke mofenyi.
Translated by Nchema Rapoo