‘Modimo, leoto la ka le le tee, Phyllis le lengwe’
Ge morwedi waka Phyllis a hlokofala ke be ke sa na bonnete bja gore ke tla loka. E be e le o ka re Modimo ke leoto la ka le le tee gomme Phyllis le lengwe. E be e le Phyllis yo a nthušitšego go aga ngwako waka e be a nthekela setofo ge a be a šoma, le dithaele tša ka ntlong, le dilo tša ka mo phapošing ya bohlapelo tšeo re sa kgonago go di lokela.
Dibeke tša go feta Phyllis o tlile a tlo hlokofala mo ngwakong waka. O rile seo a bego a se nyaka ke go ba le mma wa gagwe. Ke be ke mo jesa, ke mo hlapiša, ke mo kgothatša e bile ke mo hlokomela dinako tše ka moka. O be a robola mo mpeteng wa ka le nna. Go be go le boima go nna, gore ke sepele ka ntlong; ke nagana gore ge a ka nyaka selo.
O be a boeletše selo sa go swana gantši: 'ke tsela ye letelele yeo Mama le nna re swanetšego go e sepela, eupša ke ikemišeditše go hwa bjale. Ke amogetše ka lebaka ka gore ga go na selo se se sepelago gabotse. Se ke tshwenyegilego ka sona, ke wena. Na o tlile go kgotlelela bjang? O tlo hwetša kae tšhelete ya go mpoloka?
' Ke ile ka mmona a ntebeletše a nagana gore ga ke lemoge, o be a rotha keledi mo leihlong la gagwe, gomme ke a tseba gore o tshwenyegile ka nna gape. Ke nagana gore o no kgotlela bophelo ka lebaka la ka. Se ga se a mo lokela, le nna ga se a ntokela, go boima bjale.
Go Kgopela thušo mo Bagwereng
Ke ile ka ya go Bokoko ba bangwe, bagwera ba ka mo kgauswi gomme ke ile ka ba kgopela gore ba boledišane le Phyllis ba mmotše gore o swanetše go ya sepetlela go yo hlokofala gona, ka gobane dilo tše kamoka di bohloko kudu go nna e bile ga ke sa kgona. Ba ile ba nthuša. Ba ile ba mo hlalošetša gomme o ile a ya sepetlele.
Nako ye nngwe le ye nngwe ge a be a lwala ke be ke lewa ke bodutu, ke ipotšiša gore go tla ba bjang ge a sepela. Eupša gonabjale, baagišane ba nketela, ba tla go bolela le nna ka ga seo se hlagilego ka Phyllis, gomme ba ntlišetša dijo go nthuša. Maloko a kereke a tlo tla mo polokong ya gagwe gagwe. Bjale ke na le bosesi bja ka ba GAPA. Ye ke kanegelo ya ka ya nnete.
Ao, ka moo ke dumago o ka re mme wa ka nka be a phela go kwa taba ye. Ke tlile go botša setlogolo tša ka, Juliette, gore a kgone go bona gore makgolo wa gagwe o be a tshwenyegile bjang mo bophelong le gore ka morago ga dilo tše kamoka ke mofenyi.
Translated by Lebogang Sewela