Diperekisi tsa Afrika Borwa
Diperekisi e ne e le tse ding tsa ditholwana tse neng di lengwe pele Kapa Bophirima kamora ho fihla ha Jan van Riebeeck in 1655, mme ka 1892 e ne e le se seng sa difate tse lengwang ka ho fetisisa Cape Colony, hammoho le di-nectarine.
Diperekisi di ile tsa betla tsela bakeng sa ho romelwa kantle ho naha ha ditholwana ha e tla ba tholwana ya pele ya ho romelwa ho tloha Afrika Borwa ka Pherekgong 1892. Tholwana ena e thootse e ile ya romelwa England ka sekepe sa Drummond Castle sa phufodi mme ya ba le theko e ntle ho feta kamoo ho neng ho lebeletswe sethathong.
Mefuta ya Afrika Borwa
Mefuta e mmalwa ya diperekisi tsa dijo tse tswekere le mofuta wa cling e a lengwa Afrika Borwa, ka kgetho e tataiswang ke ditlhoko tsa tlhahiso le mebaraka. Mefuta ya kgale e nkelwa sebaka ke mefuta e ntlafetseng, e sebetsang hang ha ena e fumaneha.
Ka 2014, mefuta e ka sehloohong ya diperekisi tsa dijo tse tswekere e ne e le Transvalia, Sunsweet, Temptation, Witzenberg, San Pedro, Novadonna, Summersun, Golden Pride, Experimental, Fairtime le Excellence.
Kakamas, Keisie le Sandvliet di ikarabelletse palong e fetang halofo ya mefuta ya perekisi ya cling ka nako e nngwe e itseng. Mefuta e meng e kenyeletsa Oom Sarel, Western sun, Prof Neethling, Cascade, Supreme, Prof Malherbe, Wotemade, Goudmyn le Bonnigold.
Mofuta wa Cling Kapa Dessert
Tlhahiso ya diperekisi e arotswe ka mekgahlelo e mmedi: cling le dessert. Diperekisi tsa cling di na le thootse e nang le ho mamarela bokahareng ba perekisi, e leng ho thatafatsang ho tlosa thootse ntle le ho senya bokahare ba perekisi. Diperekisi tsena di sebedisetswa ho tshelwa makotikoting, ho etswa ha mofutswela, jeme le di-jelly.
Diperekisi tsa dessert di boetse di bitswa freestone hobane thootse e bonolo ho e tlosa ntle le ho senya bokahare ba perekisi. Hangata di kgolwanyane, di tiile ebile ha di na lero le lengata jwaloka mofuta wa cling. Di rekiswa mmarakeng di le ntjha mme di ka boetse tsa sebedisetswa ho tshelwa makotikoting kapa ho baka.
Tshebediso
Diperekisi di na le fibre e hodimo, divithamin, diminerale mme di na le melemo ya dimela e jwaloka di-antioxidant tse sireletsang mmele ho sekgahla sa ho tsofala. Tholwana le letlalo di a jowa empa thootse e a lahlwa.
Diperekisi di ka jowa tala, tsa sebediswa disalateng, tsa omiswa, tsa tshelwa makotikoting kapa tse sebedisetswa ho etsa chutney, moro, tsa kwalla kahara dibotlolo tsa ditholwana ka motswako wa tswekere, jeme kapa bakeng sa ho baka.
Dikeletso
Ha ho rekwa ditholwana tse sa tswa kotulwa, sheba tholwana e boreledi, e tiileng ebile e le mmala o hlakileng. Tholwana e bonolo le tholwana e tiileng di ka jowa hang hang. Le ha ho le jwalo, tholwana e tiileng e ka bolokwa nako e teletsana mme e ka butswiswa ka ho e kenya ka sejaneng le ditholwana tse ding, tse kang diapole le di-banana. Diperekisi di ka behwa ka sehatsetsing ho fokotsa sekgahla sa ho butswa.
Peo e ka tloswa ka ho seha perekisi motserong, e be dikotwana di sothelwa mahlakoreng a fapaneng mme dikoto di arolwe.
Translated by Maletsatsi Sejake