Ligama le science: Zea mays L. var. rugosa
Ligama lelijwayelekile: Sweet Corn
Kuchaza sihlahla
Umbila kutsiwa uchamuka eCentral America, yacalwa kuhlanyelwa eAfrica ngabo 16th na 17th Century. Umbila lona uhlobene nalombila lomhlophe kutsi wona lona unashukela kakhulu.Ucishe ufane netjani kutsi wona ukhula ube mudze. Kukhula emacembe asukela emtimbeni kwalesihlahla, bese kuba netimbali etulu kwalesihlahla sembila, loku kusuke sekusho kutsi umbila sotovutfwa. Sihlahla siveta sibhuluja sembila sinye noma tibe tibhili.
Umsebenti wembila
Umbila udliwa ucedzwa kuvunwa, noma ubiliswe noma ngalesinye sikhatsi wosiwe. Letibhuluja tiyasuswa kulomtimba walesihlahla tifakwe efrigini noma etikoteleni.Umhlabatsi lodzingekako nekulungisa umhlabatsi
Cala kulungisa umhlabatsi kusenesikhatsi ungakahlanyeli noma nawucedza kuvuna lesilesinye sitjalo bosihlanyele. Uma kusele tinyanga letitsatfu noma letine kutsi uhlanyele, umcuba noma ngumuphi namanyolo lodzingekako ungafakwa kuleyo ndzawo letolinywa. Ungabese uyahlanganiswa nemhlabatsi kushobela lokungu 500 mm. Emuva kwaloko hlanyela sitjalo lesivalako. Uma sitjalo lesivalako sesimilile, faka 100 kg yeLAN kuli hecta linye kusita kukhulisa lesitjalo.
Uma sekusele tinyanga letimbili kutsi uhlanyele, tsatsa lomunye umhlabatsi uwuyise kubo dokotela bemhlabatsi kutsi bahlole umhlabatsi.
Uma sekusele emaviki lamatsatfu nomalamane kutsi uhlanyele, uma sotfolile kutsi bocwephesha batsini ngalomhlabatsi, lesitjalo lesivalako siyasuswa bese tintfo lekufanele utingete njenge lime kulungisa pH yemhlabatsi, gypsum kwentele iCalcium, uphindze ufake umcuba kwenta lomhlabatsi uvundze, ukuhlanganise nemhlabatsi ngelikhuba.
Uma sekusele emalanga langu 7 kutsi uhlanyele, lomhlabatsi uyalungiswa kwekugcina loku kujwayelwe kwentiwa ngelikhuba. Ulungise umhlabatsi kahle ngekubulala emagadze kanye nekususa likhula lelivelile.
Simo selitulu
Umbila sitjalo lesenta kahle endzaweni leshisako, awuvani nekubandza kakhulu. Umbila wenta kahle ngabe emazinga ekushisa abo 18°C kuya ku 28°C. Kute inhlanyelo imile kahle futsi ikhule ngesikhatsi lesifanako, emazinga ekushisa kufanele abe ngetulu kwa 16 °C.Umbila uyalimala uma emazinga ekushisa angaphansi kwa 10 °C noma uma angetulu kwa 35 °C.