Goldie Qayia usichazela ngelilanga bagubha lusuku lwenjabulo lwemalunga emndeni wakhe lwekubuya ekhaya kanye nekubitwa kwemalunga emmango kutsi utohlanganyela nabo kulomcimbi.
Kubuya kwa Otto Qayiya
Ngelilanga ngaphambi Otto abuye kumaholidi akhe enyanga yeNgongoni, sitotsenga imvu kuhlabela lomgidvo. Otto kanye nami sitoya kubomakhelwane, Umnumzane Madondile siyobhadal R300 noma R400 siyibhadale ngesandla bese ngemuva kwemadina yinye yemadvodzana emnumzane Madondile utoletsa lesilwane.yena na Otto batoyihlaba.
Uma emadvodzana etfu bo Vusi na Phumie sebakhulile kahle, batokwenta bona. Akusiko lukhuni – bakhule bakubona kwentiwa, ngakoke bayati kutsi kwentiwa njani. Sibite bangani betfu, nomakhelwane kanye nemndeni sitoba nephathi, sidansele umculo, kwatsatsa lilanga lonkhe langeMgcibelo. Bekuvama kuba yimphelasontfo lenhle.
Ngesikhatsi lenyama iphekwa, sifala emamethi etjani (Emacansi) esiyilweni bese sonkhe sihlala etukwawo, bomake labadzala bahlala bente indingilizi yinye, bese labasemkhatsini bahlala kuyinye, bese labo labancane bahlala kuyesitsatfu bese bantfwana bahlala ngephandle.
Lamadvodza bekaseceleni kwesibaya. Besengcisa indishi yenyama kulendingilizi yetfu, wonkhe muntfu bekatsatsa licatsa ize lenyama iphela. Emadvodza adla kucala, bese kuba bomake. Lena yindlela yebantfu bemaXhosa lebebakadze badla ngayo sikhatsi lesidze. Besinemapulede, kepha ke bekawesikhatsi lesisetulu kanye nemingcwabo. Sikhatsi lesisele, ngisho nangesikhatsi salomcimbi, bekahleli kulelibhokisi.
Wonkhe muntfu Wemukelekile
Uma sivakashi sifika ngesikhatsi sekudla, sitotso, ʹWota utodla natsi.ʹ asizange sicoshe bantfu. Bomakhelwane betfu befika kuyoyonkhe imicimbi yetfu futsi natsi Siyaya kuleyabo yonkhe. Ngiyo indlela lesifundze ngayo leyo. Bekute emafrigi ngaleto tikhatsi futsi sasinetindlela letehlukile lebesitisebentisa kanye nekuvikela inyama ngemuva kwekuhlatjwa kwemvu.
Labanye bantfu labete emafrigi basakwenta ngalendlela namanke. Kwekucala sitsatsa sibindzi, emaphaphu kanye nematfumbu bese ayawashwa bese ayaphekwa. Ngelilanga lelilandzelako, sijuba lemilente ibe tincentu kwentela kupheka, mhlawumbe kwesidlo sasemini. Ngemuva kwaloko, lesidvumbu salemvu sifakwa luswayi.
Lenyama yafakwa eludvongeni lwalesibaya ngaphandle, kanye nesigadla seluswayi. Yabese iyambonywa ngemacembe etihlahla, kwentela kutsi timphungane tingafiki kiyo. Ngemuva kwemalanga langaba sihlanu, ngesikhatsi lenyama seyomile kancane, sibese siyitsatsa siyingenise bese siyibeka kuncenye yelithayela, siyivale ngenethi siyibeke etukwelibhokisi.
Tonkhe letitintfo tigcina lenyama iyinsha. Ngemuva kumbe kweliviki nehhafu, lenyama beseyomile kepha iyagcinwa bese ilungela kuphekwa. Sipheka incenye yayo onkhe malanga bese wonkhe muntfu loyifunako uyayitfola.
Translated by Phindile Malotana