Ukubuya kwaka Otto Qayiya
Ilanga langemva kokobana uOtto abuye ekhaya ngamaholide kanoNobayeni, sayokuthenga imvu yokobana siyihlabele ukugidinga.UOtto waya kwamakhelwanethu ubabu uMadondile wayomubhadala iR300 nanyana i-R400 ngemvakwamadina layo, omunye wamadodana kababu Madondile wasilethela imvu wasihlabela yona. Amadodana wethu uVusi kanye noPhumie nasele babadala ngokwanaleko, bazozenzela. Akusibudisi –bakhule babona kusenziwa, njeke bayakwazi.
Sabiza abangani bethu abomakhelwani, nenini zethu bona beze ephathini, sasidansela umbhino, ngomgcibelo woke. Bekuhlala kuyipelaveke emnandi, lokha nakuphekwe inyama, sabeka imiseme emidala eflurini sahlala kiyo, abomma abadala bahlala bodwa beminyaka ephakathi nabo bodwa, abentwana badlala ngaphandle.
Amadoda ahlala eduze kwesbayeni. Sadlulisela isikotlela senyama woke umuntu athatha isicetjhana senyama yaze yaphela. Kwathoma kwadla amadoda, kweza abomma, le yindlela amaXhosa adla ngayo kusukela kade. Gade sinamapleyiti, kodwana besiwasebenzisela iminyanya nemigcwabo kwaphela. Isikhathi esinengi ngitjho nangeminye iminyanya gade ahlala ngerageni.
Woke Umuntu Umenyiwe
Nagade kuze iimvakatjhi ngeminyanya, besithi ‘izani nizokudla nathi, gade singaqothi abantu. Abomakhelwani bebeza bazokugidinga nathi ngeminyanya begodu nathi besiya keyabo. Leyo kwakuyindlela esasiyifundiswe ngayo. Gade zingekho iinqandisi lokha nasisakhulako, gade sinendlela ezikhethekileko zokubeka inyama ngemva kokobana imvu sele ihlatjiwe.
Abanye abantu abanganaqandisi basayenza njalo. Kokuthoma besikhipha isibindi, amaphaphu, namathumbu siwahlanye bese siyawapheka.Ngelanga elilandelako, sisike iinyawo sizenze iincephu, senzela ukudla emini. Ngemva kwalokho umzimba wemvu uzokufakwa itswayi, bese kuthi inyama leyo ilengiswe esibayeni ngaphandle, ifakwe itswayi.
Bese ivalwa ngamacembe abuya emthini ukwenzela bona ingakhanjwa zimpukani. Ngemva kwamalanga amahlanu nasele inyama yome kancani bese siyingenisa ngendlini siyibeke esenkeni siyivale ngetjhila siyifake ngerageni. Ngokwenza njalo inyama beyingaboli. Ngemva kweveke nehafu, inyama bewuyithola sele yomile kodwana ingakaboli begodu sele ilungele ukungaphekwa. Gade siyipheka kancani kancani malanga woke begodu woke umuntu oyifunako gade ayithola.
Translated by Busisiwe Skhosana