Kuhlanyela pelepele
kuhlanyela pelepele kucala ehlanyelweni.
Indlela yekuhlanyela
Tinhlanyelo tingavele tihlanyelwe kepha akusiko lokujwayelwe kwentiwa balimi. Letinhlanyelo tihlanyelwa endzaweni yakhona leseceleni noma emakasini noma endlini lelihlata. Lenhlanyelo ibese iyamila bese kwentiwa titfombo. Uma titfombo setivelile, setitindze nga 15+cm futsi seticinile, tibese tiyasuswa tiyiswa engadzini. Kusebentisa intfo levundzile noma emaplasitiki emalayinini kunciphisa kusha kwemanti, kuncoba likhula nalokunye lokunyenti.
Sikhala
Emahlatsi lamancane ahlukaniswa nga 30 cm emalayinini lahlukene nga 50 cm, loku kwentela kutsi kube nesikhala lesanele kute basebenti bakhone kuhamba kanye nekungena kwelilanga. Tihlahla letingatsi tikhulu tihlukaniswa nga 50 cm emalayinini lahlukene nga 60 – 75 cm. Loku kudzinga 20 000 – 50 000 kuli hecta linye, kuye futsi ngalesikhala nenhlobo yapelepele.
Sikhatsi sekulima
Endzaweni levikelekile njengendlu lelihlata noma lapho busika buyaphuta kufika nalapho intfwasa hlobo ishisa, kulima inhlanyelo yapelepele kungacala nga July. Uma wenta titfombo endzaweni levulekile noma uvele uhlanyela inhlanyelo, letinhlanyelo tilimwa nasekutophela August kanye na September kute tingatfolwa intfwasa hlobo lepholile.
Sikhatsi sekuhlanyela
Emuva kwemaviki lasihlanu kuya emavikini lasitfupha emuva kwekuhlanyela inhlanyelo yapelepele, titfombo tingahambiswa uma setifika kuma cm langu 15 kuya ku 20. Khetsa tihlahla leticinile futsi utame kukhetsa tihlahla letifanako. Loku kujwayele kuba nasekutophela July etindzaweni letishisako kuya emkhatsini kwa September. Kuhlanyelwa kepha kungentiwa kute kufike ekupheleni kwa November nangabe kungena kwebusika kungabandzi kakhulu.
Sikhatsi sekukhula
Kusukela enhlanyelweni kuya kupelepele loluhlata ngemubala lolungela kuvunwa ungatsatsa kuya emavikini langu 16. Pelepele lobovu ngemubala utsatsa tinyanga letisitfupha, uma lopelepele uyekelelwa kutsi wome, tinyanga letisitfupha kuya kuletingu 8 kusukela ekuhlanyelweni kwenhlanyelo kuya ngekutsi simo selitulu sinjani. Pelepele lowomile lobovu ngemubala ungalinywa lapho etindzaweni letishisako futsi lapho lingani khona.
Manyolo
Kumcoka kutsi umhlaba uhlolwe kahle bantfu labanelwati ungakahlanyeli. Lokumcoka nawufaka manyolo kupelepele wakho, yenta loku lokulandzelako. Yenta siciniseko kutsi umhlabatsi ulinywe kahle futsi ucondzile. Uma solima kwekugcina, lokujwayele kwentiwa ngelikhuba noma umshina. Kufanele ufake manyolo lofakwako ungakahlanyeli longu 500 kuya ku 800 kg we 2:3:4 (30) (lapho kuhlanganiswe khona iNitrogen, Phosphates kanye ne Potassium) emhlabatsini longetulu. Uma unisela faka 250kg ye LAN kuli hecta ngalinye emavikini langu 6 emuva kwekuhlanyela.
Kunisela
Uma ucedza kuhlanyela nisela 15 mm ngeliviki ekucaleni kwemaviki lamatsatfu, emuva kwaloko nisela 30 kuya ku 40 mm ngeliviki ngalesikhatsi sekukhula. Kumcoka kufaka tintfo letitobuka kutsi umhlabatsi umanti kangakanani. Timphandze letinyenti tikulomhlabatsi longetulu, lifosholo lingasebentiswa kuhlola umhlabatsi. Indlela lekahle yekunisela ngulena lebitwa nge ‘drip irrigation’ lapho khona liplastiki liniketa balimi litfuba lekutsi bakhone kulawula kunisela nekuvundzisa umhlabatsi. Kunisela kakhulu kungabangela kutsi kube nelicabhoti lemanti.
Translated by
Thandokuhle Motha