Lisiko lema Xhosa Ngemuva Kwemngcwabo
Ngemuva kwemngcwabo wemyeni wami, make wami watsatsa Anthony indvodzana yami waya nayo eGugulethu ngoba bekudzinga kutsi ngibuyele eEastern Cape. Ngelisiko lesiXhosa, uma umyeni wakho ashona kumele uhambe uyohlala nemndeni wakhe umnyaka munye, uphindze ugcoke tembatfo letimnyama ngaleso sikhatsi kwentela kukhombisa kutsi uzilile.
Kwatsi nakuphela loyo mnyaka, ngacela kubuyela emuva eKapa ngiyosebenta ngitokwakha imali yebantfwabami labasitfupha. Ngabashiya eEastern Cape ngahamba ngayosebenta eKapa njengesisebenti sasetindlini, njengendlela make wami enta ngayo. Ngalelinye lilanga, makhelwane wefika kimi watsi bantfwabami bayahlukunyetwa eTsolo.
Uma ngabe tinkhomo noma timvu tingakabuyi ekhaya, Kenneth utoshaywa futsi utobaleka ayobhaca kulendzawo yakhe lefihlekile – likona lasengadzeni – bese ubhaca nakulotjani lobudze. Ngudzadze wabo kuphela, Phyllis, lobekati kutsi ukuiphi futsi akatjelanga muntfu. Ngalesinye sikhatsi, kusho makhelwane, labantfwana bebangavunyelwa kutsi baye esikolweni.
Loko ngiko lokwaba yinkinga kimi kakhulu. Bantfwabami bekudzingeka kuts baye esikolweni. Bengenta siciniseko kutsi likusasa labo lichakaze. Umntfwana lonemfundvo uba nemphilo lenhle kakhulu emphilweni yakhe, make wami bekavama kusho njalo. ʹBabe wakho bekanguthishela futsi bekanemphilo lencono ngoba bekanemfundvo,’ wangitjela kanjalo.
Timo Letifanako, Imiphumela Lefanako
Kungabukeka kungajwayeleki kutsi ngahlukunyetwa ngumndeni wami lomkhulu ngisengumntfwana, nanjalo kwenteka intfo lenjalo kubantfwabami. Kwenteka ngalendlela ngoba timo tetfu betifana. Ngelisiko letfu make kanye nebantfwana baneligunya leliphansi kunalamanye emalunga emndeni umangabe lomntfwana angenaye bane, noma lendvodza ingekho.
ʹMake, angeke ngikukhone loku,ʹ ngamutjela kanjalo. ʹBantfwabami kumele babuye kimi.ʹ Bengisisebenti lesihlala khona lapho ngisebentela khona, benginendlu yami ngasemuva yendlu lebengisebenta kiyo emadolobheni ase Heathfield. Bekute indzawo yeBantfwabami kutsi bakhone kuhlala nami kuleyo ndlu.
Sikhashana Anthony wahamba wayohlala namake wami eGugulethu, kepha lobabe lobekatsatsa make wami abengakutsandzi loko. Ngulapho ke ngakhetsa kwakha khona umkhukhu ePhilippi — ngentela kutsi ngitokhona kuba nebantfwabami.
Bafana Labahlanyako/Labanemahhunga
Kwakulukhuni, Kubakhulisa ngingedvwa. Bebahlanya, ikakhulu labafana. Anthony washiya sikolwa nakasebangeni lesikhombisa, umnyaka wesibili kubanga lelisetulu, kwatsi Kenneth washiya kubanga leliphansi. Kunemalanga lapho khona labantfwana besebabadzala, lapho bengitsi kimi, 'Kube indvodza/umyeni wami bekasaphila, bantfwabami ngabe abahluphi ngalendlela.
Labafana ngabe abanatsi tjwala futsi ngabe ababaleki esikolweni.' Hhawu lokumosha sikhatsi sabo kangaka, impela. Njengesibonelo nje, Ngiyakhumbula nje kutsi Kenneth bekadvweba kahle futsi bekakadze anesandla lesihle. Bafana bami ngabe benta kahle kakhulu.
Translated by Phindile Malotana