Isiko LesiXhosa ngemva Kokubhujelwa
Ngemva komngcwabo wendodami, umma wathatha indodana yami uAntony waya naye eGugulethu ngombana kwakufanele ngibuyele e Eastern Cape.Ngesiko lesiXhosa lokha indodakho ibhubhako kufanele uyokuhlala nomndenayo unyaka woke, wembathe izambatho ezinzima ukutjengisa bona uzilile. Kwathi nakuphela unyaka loyo ngabawa ukubuyela eKapa ngiyokusebenza, khon ngizokwenza imali, ngondle abantwabami abasithandathu.
Ngabatjhiya e Eastern Cape ngayokusebenza e Kapa njengonomakhitjhi, njengobana umma enza. Ngelinye ilanga umakhelwani weza kimi wangitjela bona abentwebami bayatlhoriswa eTsolo. Nangabe kunenkomo namkhana izimvu ezingakabuyi uKenneth ubetjhwa abaleke ayozifihla endawenakhe ekhethekileko –nekusehogwini lesimini azifihle etjanini obude.
Gade kwazi udadwebo yedwa uPhyllis bona ukuphi begodu bekangatjeli muntu. Umakhelwani lo wangitjela nokobana ngesinye isikhathi abentwabamaba bebangavunyelwa nokuya esikolweni, lokho kwangitjhwenya khulu. Gade kufanele bona abentwabami baye esikolweni, bekufanele ngiqiniseke bona baba nekusasa elihle.
Umntwana onefundo onethuba elibhedere epilweni, umma gade atjho njalo. Ubabakho gade angutitjhere begodu waba nepilo ebhedere ngombana gade afundile wangitjela njalo.
Ubujamo obufanako, imiphumela efanako
Kungabonakala kungakajwayeleki bona ngatlhoriswa ngamanye amalunga womndenami lokha ngisesemntwana, njeke into efanako besele yenzeka ebantwaneni bami. Kwenzeka ngendlela le ngombana ubujamo bethu gade bufana.
Esikweni lethu umma nabantwabakhe banobujamo obuphasi kunamanye amalunga womndeni nangabe umntwana loyo anganababa, nanyana indoda inbgekho lapho. ’Mma, angiyirhoni intwe le, ngamtjela najlo.
’Abentwabami kuzakufanela bona beze kimi.’ Ngeskhatheso ngangingunomakhitjhi osebenza bekalale la asebenza khona, nginekamero ngemva kwendlu yalapha ngisebenza khona emakhitjhi we-Heathfield.
Yayingekho indawo yabentwabami ebangahlala kiyo ekamerwenelo elalilincani. U Antony wakhamba wayokuhlala nomma isikhatjhana eGugulethu. Kodwan ubaba owayehlala nomma khange akuthande lokho, njeke ngakha umkhukhu ePhillippi-ukwenzela bona ngihlale nabentwabami.
Abesana abagangileko
Kwakubudisi, ukukhulisa abentwana ngingedwa.Bathoma bangasezwa khulukhulu abesana. U Anthony walisa isikolo lokha enza ibanga lekhomba, nokunyaka wesibili wemabangeni aphezulu. UKenneth wasiyekela emabangeni aphasi.
Kwakunamalanga lapha abantwanaba sele bakhulile, lapha bengithi khona, nangathana ubaba wakwami usaphila abentwabami ngabe abagangi kangaka, ngabe nje abaseli bebabaleke nesikolweni. Gade bazimosela isikhathi nerhono. Isibonelo, ngikhumbula bona uKenneth gade anerhono lokhudweba begodu atlola kuhle. Abesana bami ngabe benza okunengi.
Translated by Busisiwe Skhosana