Sitjalwa njani
Sitjalwa ngembewu
Indlela Yokutjala
Ama-leek angatjalwa ehlabathini ngembewu nanyana angatjalwa ematreyini wembewu emibhedeni ekutjhukusiweko kuma-greenhouses. Lokha imbewu zazo sele zikhulile zingaba yi-15 cm ngobude okwenzeka ngemva kwemveke ezisithandathu, atjalwa emasimini. Abalimi abanengi bakhetha ukutjalwa imbewu ngombana kwenza bona iintjalo zibe zinengi qobe li-hectare begodu zivunwa msinya begodu ngokulingana.Ama-leek lokha nakatjalwa ngesandla abamsebenzi omkhulu begodu kuyadura. Ukuwatjala phasi kungenziwa ngesandla nanyana ngomtjhini. Ukuthola ama-leek amhlophe amade kungcono ukwemba amaforo ozokutjala kiwo abe yi-15cm ngokutjhingela utjale imbewu ngaphasi komgodi lo uvale imirabhu kanye nesidindi ngemva kokuwatjala. Ngemva kwemveke ezine nase iintjalo sele zimilile ihlabathi ingenziwa indunduma ukuvala isidindi. Ubude obulungileko besidindi esimhlophe buyi-15 cm ukuya ku- 20 cm.
Lokha nawuwatjalaphasi ehlabathini, ukulawula ikhula kuba mraro lokha nawusathoma ukuwatjala. Ngebangelo, ukutjalwa ama-leek ngama-plantjies kuthandwa kangaka ebalimini abatjala ngehloso yokurhweba ngawo ngombana lokhu kuvumela bona ikhula lilawuleke ngphambi kokuwatjala.
Iinkhundla
Iintjalo zingenzelwa iinkhundla ezihlukaniswe ngamasenthimitha ayi-15 emareyini ayi-30 cm nanyana i- 50 cm namareyi avundlileko atjhiywe yitregera nakutlhogakalako. Lokhu kuzokunikela indawo esitjale ama-leek angaba yi-120 000 ukuya ku-200 000 qobe li-hectare.Ama-leek amancani atjalwa emaduzelani ngombana iskhathi sawo sokukhula sifitjhani begodu ikhula alikavamisi ukubamraro.
Iskhathi Sokuwatjala
Iskhathi sokutjala ama-leek ematreyini wembewu senziwa hlangana kwemveke ezisithandathu ukuya kwezine ngaphambi kwesikhathi esibekiweko sokuwatjala.ESewula Africa, iinkhathi ezimbili ezithandeka khulu zokutjala ama-leek kungesilimela, ukusukela ekuthomeni kwakaNtaka ukuya ekuthomeni kwakaSihlabantangana, godu nalada ebusika kusukela ngoVelabahlinze ukuya ngoRhoboyi.
Iskhathi Sokuwatjala
Ama-plantjies wawo atjalwa kusukela ngoSihlabantangana ukuya ngoMrhayili bese godu lada ngoRhoboyi ukuya ngenyanga kaKhukhulamungu.Iskhathi Sokukhula
Lokha uwatjale phasi ehlabathini angathatha iinyanga ezisithandathu ukulunga. Njeke nange imbewu itjalwa ngoNtaka izokulungela ukuvunwa ngoRhoboyi ukuya kuKhukhulamungu.Nange i-plantjies eliphakanyiswe kuhle litjalwa ngoSihlabantangana nanyana ekuthomeni kwakaMrhayili lingalungela ukuvunwa lada ngoVelabahlinze nanyana ekuthomeni kwakaRhoboyi. Ukutjala kwembewu ye-leek kunama-plantjies konga inyanga ekutlhogonyelweni kwesitjalwesi kanye nemali.
Ukuzivundisa
Njengobana kutjhiwo nakulungiswa ihlabathi kuphakanyiswa bona uthathe isampula yehlabathi uyokufuna izeluleko kusiyazi ukuqiniseka bona ufaka izakhi mzimba ezilungileko begodu nokobana utjala endaweni elungikeko.Kuphakanyiswa iinyeleliso ezilandelako ukuvundisa ama-leek. Ngeveke yangaphambi kokobana utjale ama-plantjes wayo, faka i-250 ku- 300 kg -ye 2:3:4 (30) qobe i-hectare lokha nawulungiselela ukutjalwa emibhedeni upete ihlabathi engaphezulu eyi-20 cm. Lokhu kuletha izakhi mzimba khonokho ngemva kokutjala ama-planjies we-leek begodu kuzokunikela istjalo amandla wokuthoma kuhle begodu azosirhelebha ukutlhogomela ukobana zingagandeleleki ngokomkhumbulo lokha nazisuswa emumathini zifakwa ehlabathini.
Nange utjala i-leek ngembewu, faka isivundisi sokuthoma emareyini wentjalo msinya ngemva kokobana iintjalo ezitja zimile. Ngemva kwemveke ezimbili ukuya kwezintathu, rhatjha isivundisi godu emareyini wentjalo.
Ngemva kwemveke ezintathu, faka i- 250 kg ye- LAN (28) emareyinin wentjalo. Lokhu kufanele kwanele iintjalo kwenze zikhule begodu zilungele ukuvunwa.
Susa ikhula ngombana lizokwebela iintjalo izakhimzimba
Ukuthelelela
Faka i-10 mm yamanzi ngaphambi kokutjala ama-plantjies we-leek nenye ngemva kowatjala. Thelelela qobe veke ngamanzi ayi-20 kanye ne- 30 mm ahlukaniswe kabili iveke yoke begodu azokwanela bona zikhule. Kuqakathekile ukobana ihlabathi ihlale inamanzi kodwana angabi yitlabhatlabha.Translated by Busisiwe Skhosana