Umlando Wemvelaphi Yawo
Imvelaphi yama-nectarine ayaziwa, kodwana kudlunjanwa kobana avele eminyakeni eyi-4 000 eyadlulako enarheni ye-China, ngesikhathi lapha kwathoma khona amaperegisi. Imihlobo eminengi yawo namhlanje ivela ku-ecotypes e-China.
Ama-Nectarine kanye namaperegisi zintjalo zimhlobo munye kodwana lokha nazithengiswako ziyahlukaniswa kube zinthelelo ezihlukahlukeneko, Umehluko omkhulu kukobana ama-nectarine enesotja elibanga kobana abeneskhumba esibutjhelelezi, lokha amaperegisi aneskhumba esingasibutjhelelezi. Ngaphandle kwalokho, ama-nectarine asudu begodu mancani kunamaperegisi.
Ibizo elithi ‘nectarine’ latlanywa e-England kokuthoma ngeminyaka yabo-1616, begodu kuhlunjanwa kobana livele ebizweni elithi-‘nectar’ elitlhadlhula ubusudu besithelo. Inarha ye-China ikhamba phambili ngokukhiqiza ama-‘nectar’.
Ama-Nectarines weSewula Africa
Ama-nectarine kanye namaperegisi ngezinye iinthelo zokuthoma ezatjalwa eSewula Africa nakufika u-Jan van Riebeeck ngonyaka ka-1655. Ngonyaka ka-1892, ama-nectarine kanye namaperegisi bekuzintjalo ezitjalwe khulu eKapa.
Indawo Yokuwakhiqiza
Ama-nectarine akhiqizwa eSewula Africa yoke, kodwana amanengi wawo avela esifundeni se-Western Cape. Ngokuya ngokwe-Hortgro Tree Census yonyaka ka-2018, ayincenye yomkhiqizo omnengi ovela e-Wolseley, Tulbagh, the Klein Karoo, Paarl, kanye ne-Northern Province.
Imihlobo Yama-Nectarine
Imihlobo eminengi yama-nectarine itjaliwe, ngesiphetho sokobana mhlobo bani ongawutjala okugcugcuzelwa mafekutha webhoduluko kanye ngokobana iimaraga zifuna anjani. Abalimi bajamiselela imihlobo yawo emidala ngemitjha angcono.
Ngonyaka ka-2018, i-Alpine gade kumhlobo wawo otjalwe khulu, ulandelwe yi-August Red. Hlangana neminye imihlobo kubalwa i-Royal Ruby, Super Star, May Glo, Luciana, Fantasia, Sunburst, Skye, Tiffany, Artic Wolf, Sunlite, Garofa, Margaret’s pride, Crimson Glo, September Bright, Summer Fire, Fire Pearl, Garcia kanye ne-Summer Bright.
Imihlobo yama-nectarine iyahluka naziza ekuqandisweni kwazo, iskhathi sokuvuthwa kwawo, indlela aqaleka ngayo nokubanjwa kwawo malwelwe ahlukahlukeneko. Isikhumba sawo sivamise kobana sibe sarulana nanyana mhlophe.
Iskhathi Sokuwathelela
Iskhathi sokuthela kwawo siya ngokobana ubujamo betlayimedi bunjani, indawo ekukhiqizelwa kiyo kanye nomhlobo westjalo. Ivamise ukuthela kusukela ngoOktobha ukuya kuMrhayili, umthamo omncani waso ukhiqizwa ngenyangakaSinyikhaba. Iskhathi sawo sokuthela sivumela bona inarha irhone ukusabalalisa ama-nectarine kwezinye iinarha ezise-Northern Hemisphere ngeskhathilokha umkhiqizwabo uphasi.
Ukuthengiswa Kwawo yiSewula Africa
ISewula Africa, nanyana kuyinarha esakhulako ethumela iinthelwezi kwezinye iinarha, sele izakhele ibizo elihle lekhwalithi ehle yenthelo ezithunyelwa ngamaphandle.Inani lamakhathoni eliwathumela kwezinye iinarha sele likhuphukile kusukela eminyakeni embalwa edlulileko, lapho umthamo odlula incenye yomthambo othunyelwa eenarheni zangaphandle uthunyelwa enarheni ye-United Kingdom. I-European Union kanye ne-Middle East nazo zithatha umthamo omnengi, lokha umthamo omncani uthunyelwa e-Indian Ocean Islands, Russia, e-Far East, Asia kanye ne-Africa yoke.
Ukusetjenziswa Kwaso
Ama-nectarines azele imithiya, amavithamini kanye namaminerali begodu amumethe ihlanganisela yentjalo eziletha inzuzo ezifana nama-antioxidant avikela umzimba kobana ungaluphali. Isthelwesi sineskhumba esidlekako, kodwana indumba yaso iyalahlwa. Ama-nectarine adliwa ahlaza amnandi nanamasaladi.
Amathiphu
Lokha nawuthenga ama-nectarine, khetha abutjhelelezi naqinileko, nakhanyako. Ama-nectarine angavuthiswa ngokobana atjhiywe eskotleleni nezinye iinthelo, ezifana nama-abhula nanyana amabhanana. Nakungasinjalo, angabekwa iskhathi eside ngokobana abekwe efrijini ukwenzela bona angafuthwa msinya khulu.
Indumba yawo ingasuswa ngokobana kusikwe i-nectarine phakathi, ihlukaniswe ibe zincenye ezimbili, bese kudoswa iincephu ezimbilezi phakathi.
Translated by Busisiwe Prudance Skhosana