UGoldie Umakhi
Ngazakhela umuzami endaweni eseduze ne St Mark's. Ngayenza ngendlela yesintu,ngedaka nestina beyipleyisterwe ngomvango wobulongwe bekomo nedaka. Ngaqatjha umuntu bona angiforomele iintina. Ngazisa kumakhi ngengolovana, bengithwala amanzi ngethunga ehloko ngimsele.
Kwathi lokha sele sesakhe amaboda, ngapleyistera iintina ngedaka. Sasebenza ubusika boke,lokha nalinganiko izulu, kwathi ngemva kwenyanga ezisithandathu sabe sele sinendlu, inekumba yokulala, ikumba yokudla kanye nekumba yokupheka.
Ukuba Ngumma Oyedwa
Kwathi ngemva kokobana sitjhade, u-Otto wabuyela emsebenzini eSaldanha Bay esifundeni se Western Cape, e-Canning Company. Gade angenayo enye indlela angenza ngayo, ngombana gade kunganamsebenzi eTranskei.Wasebenza khona iminyaka eyi-23 eminyakeni, yoke leyo besibonana imveke ezintathu ngonyaka, ngamaholideyi.
Ngemva kweminyaka emine sitjhadile, nangemva kokobana izibulo lethu libelethiwe, ngaya eLanga eKapa nontwana ukwenzela bona ngibe seduze no Otto isikhatjhana, sahlala lapho nokgari uNomalizo. Amapholisa khabe ajikajika endleleni bafuna amapasi ebantwini, njeke ngangihlala ngizifihle ngendlini.
Unomalizo nabentwana bakhe, gade banawo amapasi. ’Wamukeliwe ekhayapha, kodwana ungakhambi ilokitjheli loke phakathi kweveke ngombana amapholisa azokubopha, wangiyelelisa. Ngepelaveke gade kubhedere khulu. Amapholisa gade aye amakhabo, njeke besirhona ukuya edorobheni. Maye! kwakumnandi eKapa, kunamavikili azele izambatho nenyama; begodu yoke into gade ithengeka kuneTranskei. Bengirhona ukusa uVusi kudorhodere bona ayomhlola.
Kamva uOtto wangithengela umtjhini wokuthunga, newokuluka eKapa.Kwangithabisa khulu lokho, ngombana ngithanda ukuzenzela izinto. Kodwana ukuhlala ngendlini iskhathi soke kwakungakgonakali. Ngahlala inyanga eKapa, ngakhamba.
Ithando Liyathumba
Iminyaka eyadlulako beyitjharagene kuOtto.Wakhe wathola umsebenzi eKapa e-ofisini elikhulu le- food workers' union, asebenza nonobhala jikelele uJan Theron. Gade bavamise ukuya emakampanini lapha abasebenzi bakhona gade baphikisana nabaqatjhi babo, ukuyokurarulula ukungazwani kwabo.Kwakubujamo obubudisi kuOtto.
Gade afuna ukwenza umsebenzi,kodwana nagade kungenzeka bona amapholisa ambambe asawenza, ngabe bambopha, njeke ngabe lokho kwababekami abantwabakhe abane kanye nami? Njeke nanyana bekubudisi hlangana komfazi nendoda bona bahlale endaweni ezahlukeneko, beyingekho into esingayenza.
Sathola amandla wokobana senze lokho ekwakufanele bona sikwenze. Sithoma mvanje, ngemva kokobana sobabili sithathe umhlalaphasi bona sihlale sobabili, sithome nokwazana kuhle. Sithabile kwanjesi. Ngelinye ilanga ngatjela ubaba wakwami bona, ngifuna sitjhade kwesibili, sibize boke abantu esibaziko, abadala nabancani, bazosibona sitjhada kwesibili.
Wathi’Ngizokumbatha ini?’ Ngathi, ’oh sidinga nekomo –ikomo enonileko – nemvu yokugidinga.’ ‘Kubhedere sisebenze sizokukgona ukubulunga, ngombana akekho phakathi kwethu osebenzako kwanjesi, begodu sizokutlhoga imali enengi 'wangiphendula njalo.'
Njeke ngamtjela bona, ’Uyabona, bona gade unomona bona ungivumele bona ngibe ngutitjhere, kodwana nje sele ungikhulula?’ 'Iye, ngombana sele umdala', 'Watjho njalo. Akasekho osazovuma ukukutjhada'. Oh, ngavele ngafa ngenhleko. Ngahleka, ngahleka bengaphuma iinyembezi emehlweni.
Translated by Busisiwe Skhosana