Goldie mu aki
Ndzi ti akele yindlu ya ndyangu wa mina eka ndzhawu yalekusuhi na St Mark's. Ndzi yi endle hi ndlela ya xintu, ndzi yi aka hi switina swa misava, yiphamiwa yitlhela yi sindziwa hi vulongo. Ndzi thorile munhu leswaku ata foroma switina swa misava.
Kutani ndzi rhwalela switina leswi hi wheelbarrow ndzi kelela mati hi mabakiti lawa andzi rhwala hi nhloko. Loko makhumbi ya akiwile, ndzi phamile hi misava. Hitirhe kuvava swinene hi xixika, laha akungari na mpfula naswona eka ntsevu wa tinhweti se yindlu ayi herile, laha ayiri na kamara ro etlela, ro swekela eka rona na ro dyela eka rona.
Kuva Mutswari wa Xisati uri Wexe
Endzhaku kaloko ha haku heta ku tekana, Otto uyile eku tirheni e Saldanha Bay e Western Cape, eka Saldanha Bay Canning Company. Angari na lexi ata xiendla. Akungari na ntirho e Transkei. U fambile kuringana 23 wa malembe naswona eka nkarhi walowo ahi kota kuvonana mavhiki manharhu hi lembe, hinkarhi waku wisa ka yena.
Mune wa malembe endzhaku ka kutekana, endzhaku kaloko Vusi, n’wana wa hina wosungula, atswariwile, Ndzi yile e Langa e Cape Town na n’wana leswaku ndzitava ekusuhi na nuna wa mina Otto kuringana nkarhi nyana, laha ndzi nga fika ndzi tshama na mhani ntsongo wa yena Nomalizo kona. Maphorisa ava tshamela ro famba hi mapatu varikarhi va vutisa vanhu mapasi, mina andzi boheka ku tshama endlwini ndzi tumbela. Nomazilo na vana va yena avari na mapasi.
'U amukelekile laha, kambe unga famba fambi laha lokixini exikarhi ka vhiki handle kaswona maphorisa vata ku khoma,' Andzi lemukisa. Hiku hela ka vhiki aswi antswa swinene. Maphorisa avaya e kayanahina ahi kota kuya e dorobeni. Doroba ra Cape Town ari sasekile swinene, mavhengele yari na swiambalo swa kahle swinene na nyama; naswona aswinga durhi kufana nale Transkei.
Andzi kota naku teka n’wananga Vusi ndzi n’wiyisa eka Dokodela leswaku aya kamberiwa. Endzhaku ka nkarhi, Otto u ndzi xavele muchini wo rhunga e Cape Town. Leswi swindzi tisele ntsako swinene hikuva andzi rhandza ku endla swilo. Kambe kutshama endlwini nkarhi hinkwawo aswi nga koteki. Andziri e Cape Town kuringana nhweti, kutani ndzi famba.
Rirhandzu ri hlula
Malembe yan’wani aya tisa ntshikelelo eka Otto. U tshame a kuma ntirho e Cape Town eka tihofisi nkulu ta food workers' union, laha a tirha na matsalani general, Jan Theron. Ava tshama varikarhi vaya eka ti khamphani laha vatirhi avari na ntlimbo na vathori vavona, leswaku vaya swilulamisa.
Lexi akuri xiyimo lexi axi tika swinene eka Otto. Aswilava ku endla ntirho lowu, kambe loko maphorisa von’wikuma ari ku tirheni, avata n’wi pfalela naswona leswi aswita siya mina na vana va mune hiri hava nchumu. Hambi leswi aswitika swinene kuva nuna na nsati vangari endzhawini yin’we, kambe akuri hava lexi ahita xiendla.
Hiti kume hiri na matimba yaku endla leswi ahi fanele ku swiendla. Kova sweswi, laha hinkwerhu hinga ekuwiseni, loko ahi tshame swinwe xikan’we nakuva na nkarhi swin’we, hitivana ku antswa. Hi tsakile ekaya sweswi. Siku rin’wana, ndzi byele nuna wa mina leswaku ndzi lava vukati bya vumbirhi, hifanele ku rhamba vanhu, lavantsongo na lava kulu, leswaku vata vona loko hi tekana ravumbirhi.
Kutani aku, 'Se ndzi ta ambala yini?' Ndzi ku kayena, 'Oh, hita lava na homu — homu yo nona — na nyimpfu, ku tlangela.' 'Swivula leswaku hi fanele ku tirha hi matimba leswaku hita hlayisa mali, hikuva hivumbirhi ahi tirhi naswona hita lava mali yotala swinene,' Ku vula yena. Se ndziku ka yena, 'Wa swivona leswaku awuri na jelezi ngopfu kuva undzi alela leswaku ndziva mudyondzisi, sweswi wandzi tshunxa?' 'Intiyiso, kambe sweswi se u kurile,'A hlamula. 'Akuna munhu wun’wana loyi angata ku teka sweswi.’ Oh, ndzi fa hi mafenya. Ndzi hleke timbambu ti za tivava, kufikela matihlo ya mina yatala mihloti.
Translated by Ike Ngobeni