Ama-olive zinthelo ezenza okunengi, ezisetjenziselwa ukwenza imihlobohlobo yemikhiqizo engenisa inzuzo, ngaphandle kokukhiqiza i-olive oil okumkhiqizo okhiqizwa khulu eSewula Africa. Eminye imikhiqizo ehlobana nama-olives kubalwa ama-olives wetafuleni, ukudla okugandelelweko kwama-olives, okufana ne-tapenade kanye nemikhiqizo yokutlhogomela iskhumba eyenziwe ngama-olives.
I-olive oil yenziwe ngentandadi ezahlukahlukeneko, ikhwalithi ehle ekuyi-extra virgin olive oli, emumethe inzuzo enengi yezepilo.
Amafutha la, angahlanganiswa nenthako eziwanambithisako ukwenza umkhiqizo ohlukileko ofana ne-truffle oil, fennel-infused olive oil, amafutha enziwe ngebilibili, kanye namafutha enyiwe ngegaligi.
Ama-Olives Wetafuleni
Ama-olives sfretjhi atjhuqile begodu atlhoga ukwelatjhwa ukudosa i-acrid glucosides esthelweni ngaphambi kokobana angadleka. Kunendlela ezingenisa zokwelapha ama-olives: nekubala hlangana indlela yokusebenzisa i-lacto-fermentantion - ngokuwabibha emanzini enetswayi iskhathi. Ama-olives ingalatjhwa ngokuwafaka etswayini, nokuwabibha emanzini kanye nokunande uwapula iinyanga ezinengi - nango kusebenzisa i-lye curing okuyindlela ye-spanish esetjenziselwa ukwenza ama-olives ahlaza satjani.
Umhlobo othandwa khulu womkhiqizo wama-olives wetafuleni eSewula Africa yi-Manzanilla, Mission kanye ne-Kalamata. I-Manzanilla esanyama (ekuli-abhula elincani nge-Spanish) mhlobo okhamba phambili wokwenza ama-olives ahlaza satjani begodu unembumula ekulu. Awunawo amafutha amanengi. I-Mission yona li-olive elincani kune-Manzinilla. Ekumhlobo wama-olives atjalwa khulu adliwako kodwana ayasetjenziselwa nokwenza i-olive oil.
I-Kalamata olive iyanda eSewula Africa godu sele kutjalwe amahekuthara ayi-161. Isetjenziselwa ukwenza ama-olives anzima begodu ayinamafutha amanengi njenge-Mission.
Umkhiqizo wama-Olive Wetafuleni
Ama-olives angabapleyini nanyana anongwe nanyana apakwe emafutheni. Ama-olives anungwe ngomrhwabha, kube nama-olive anongwe ngamakhambi, ahlanganiswe namatamati onyiswe elangeni kanye nalawo afakwe i-feta cheese nanyana i-pesto ukwenza Isibonelo mikhiqizo engenisa inzuzo yama-olives.
Ama-olives wetafuleni apakwa ku-brine emafutheni nanyana enkhwameni zamaplayisitikini, emablegeni nanyana emajegeni werhalasi. Umthamo omnengi we-olive ofana ne-5kg kanye ne-15 kg ufakwa emathungeni weplayistiki. Ama-olives asemablegeni akasaba msulwa kwemvelo.
Ama-olives ingafakwa esiqandisini, onyiswe ngomoya otjhisako nanyana onyiswe elangeni.
Ama-Olives Agandelelweko
Ama-olives angahlanganiswa nezinye iinthako, ezifana ne-anyanisi kanye nebilibili ukulungisela iintjhebo, ama-chuyney kanye nejemu, nanyana angakhiwa ahlanganiswe negaligi kanye namakhambi.
I-olive tapenade yi-paste eyenziwe nga-olives agayiweko anzima ahlanganiswe nama-caper kanye namafutha wama-olives. Ingafakwa i-anchovie, iswiri kanye ne-thyme asetjenziselwe ukuzesa uburotho nanyana ahlanganiswe nefesi, i-pasta kanye nemirorho.
I-Olive pate yenziwe ngama-olives asiliweko, afakwe iinthako nanyana angakafakwa.
Izinto Zokutlhogomela Iskhumba Zemvelo
I-Olive oil sele isetjenziswe njenge-antibacteria, yasetjenziselwa ukuzela, ukuhlwengisa kanye noku-massage iskhumba, amazipho, kanye nenhluthu iminyaka emakhulukhulu. UKufakwa kwamafutha la kwesimanjemanje kuhlanganiswa nezinye iinsibha, izinto zokuzela umzimba, zokuzesa umlomo, kanye nebhatha, izinto zokuzesa abantwana ze-olive kanye nezokuqotha abonompopoloza.
I-Olive imumethe iinthako ezelaphako ekufaka hlangana i-vitamin E, squalene, polyphenols kanye nemihlobo eminengi yama-fatty acids khulukhulu i-oleic acid eyi-75% kodwana ifakwe ne-linoleic acid kanye ne-palmitic acid.
I-Polyphenols iletha iinthako ezimitjhoga ze-olive oil ekubalwa ukuqeda ukuvuvuka, iingogwana kanye nkuqinisa asotja womzimba.
Kukholelwa ekutheni i-olive oil ngiso sodwa isitjalo esinomnotho we-squalene kanye ne-squalane. Iinthakwezi, zitholakala esibindini se-shark begodu ziphungula ukutjhwabana ebusweni, eenlondeni kanye nemabaleni.
I-Oleic acid (omega 9) yaziwa ngokobana iqeda inkwethu begodu igcugcuzela ukukhula kwenhluthu. I-linoletic acid (omega) ipholisa amanceba msinya, ipholisa amathuthuva, igcugcuzela ukuhlala kobuswe eskhunjeni kanye nenhluthwini. I-linolenic acid (omega 3) iphungula ukuvuvuka kanye nevithamini E, eyi antioxidant enamandla begodu ezele amafutha we-olive afretjhi.
Tjheja: Ilwazeli lenzelwe ukufundisa kwaphela begodu akukafaneli kobana lisetjenziselwe ngomncopho wokwelapha nanyana njengeseluleko sezepilo. Alikenzelwa godu ukujamiselela ukulatjhwa nanyana iinyeleliso oziphiwa ngudorhodere.
Translated by Busisiwe Skhosana