Kgatelelô ya Tlhaloganyo e e Maswe
Morwaaka Lennox, yo a sa itekanelang sentle mo tlhogong, o ne a batla go mpolaya. Ke ka moo lebati la phaposi-borobalo ya me le senyegileng jaana. O ne a leka go roba lebati are o batla go mpolaya.
Ke ne ka lelela thuso. Morwaaka yo mongwe Kenneth o ne a leka go mo tshwara, fela nka se go bolelele maatla a Lennox a neng ana le ona. E ne ele kgatelelô ya tlhaloganyo e e maswe. Morago ga fao, ke ne ka ya kwa go tsala ya me Constance go fodisa pelo.
Re ne ra khubama ka mangole. 'Nthuse, oh Modimo', re ne ra rapela. 'Ke wena yo mogolo, mme o itse pelo ya me, kgatelelô-maikutlô nngwe le nngwe ya me. Oh Modimo, nthuse. Ke go kopile bana, mme o nneile bona. Jaanong ke na le bana, fela sengwe le sengwe ga se a siama. Ka kopô nthuse gape. Ke latlhegelwa ke tshepo.
Nna tshepo ya me, ke ya go rapela.' Morago ga gore re rapele, Constance o ne are go nna: 'Waitse gore gona le ngwana wa Diabolo? O ngwana wa Modimo. Ga a kgakala, mme pelo ya gagwe ga e a go thatafalela. Tia mo thapelong, ka gonne motsotso mongwe le mongwe, tota le fa o robetse le mo matlhokong a gago, o na le wena.
Ka go go neela matsapa mangwe, o go bopela gore o mo siamele. Ka jalo se latlhe tshepo. O falotse go di le di ntsi, mme o ne a le teng. O tlile go nna le wena go fitlhelela o tlhokafala.' Mafoko a gagwe a ntiisitse. Eya, ke dilo tse pedi tseno, ditsala tsa me le tumelo, tse di ntataisang.
Go Bona Thuso
Mme ga jaana, ke direle sengwe ka ga Lennox. Ga a itse, fela ka Mosupologo badiredi-loago ba tlile go mo tsaya ba mo ise kwa Lentegeur Psychiatric Hospital. Ke buisane le morwadiagwe mme re dumelane gore seno se tshwanetse go diragala, mme re se rulagantse. Seno se tlile go nthusa thata.
Waitse, go dilo tsotlhe tse di molemô mo botshelong jwa me, go se le sengwe se ke se itumelelang. Ke gore tebego ya me ga e bontshe tshotlegô ya me. Ke rata tebego ya me, ka gonne e tletse tsholofelo. Ke nna fela yo o itseng seêmô sa nnete se ke leng mo go sona ka mo teng ga me. Batho ba ka se itse ka go nteba fela.
Waitse, go ntse molemô go bua ka dilo tseno tsotlhe. Go thata, fela ke rata go di ntsha ka mafatlha. Nako nngwe le nngwe fa ke dira jalo, go dira gore ke ikutlwe botoka go se nene. Go tota go nthusa, go bua kgang ya me.
Translated by Nchema Rapoo