Geweldige Spanning
My seun Lennox, wat nie reg in die kop is nie, wou my doodmaak. Dis waarom die deur van my slaapkamer so verniel is. Hy wou die deur oopbreek omdat hy my wou doodmaak. Ek het geroep om hulp. My ander seun, Kenneth, het probeer om hom te bedwing, maar ek kan jou nie eens vertel watter krag Lennox gehad het nie.
Dit was geweldig stresvol. Agterna het ek na my vriendin Constance gegaan om my hart af te koel. Ons het op ons knieë gegaan. ‘Help my, o God,’ het ons gebid. ‘U is die magtige Een, en U ken my hart, my elke depressie. O God, help my. Ek het U gevra vir kinders, en U het hulle vir my gegee. Nou het ek kinders, maar alles loop skeef. Help my asseblief weer.
Ek is besig om hoop te verloor. Wees my hoop, ek bid tot U.’ Nadat ons gebid het, het Constance vir my gesê, ‘Jy weet daar is ‘n kind van die duiwel? Wel, jy is ‘n kind van God. Hy is nie ver weg nie, en Sy hart is nie hard teenoor jou nie. Wees sterk en hou aan bid, want elke oomblik, selfs in jou slaap en in jou smart, is Hy met jou.
Deur jou te laat swaarkry, is Hy besig om jou te vorm om reg te wees vir Hom. So, moenie moed verloor nie. Jy is al deur soveel, en Hy was daar. Hy sal met jou wees tot jou dood.’ Haar woorde het my versterk. Ja, hierdie twee dinge, my vriendinne en my geloof, hou my aan die gang.
Om Hulp te Kry
Nou het ek iets gedoen omtrent Lennox. Hy weet dit nie, maar Maandag gaan die maatskaplike werkers hom kom haal en hom na die Lentegeur Psigiatriese Hospitaal neem. Ek het dit met sy dogter bespreek en ons stem saam dat dit is wat moet gebeur en ons het dit gereël.
Dit gaan my baie help. Jy weet, tussen al die positiewe dinge in my lewe, is daar nog een waaroor ek jubel. Dit is dat my uiterlike voorkoms nie my swaarkry weerspieël nie. Ek hou van my uiterlike voorkoms want dit is belowend. Dis net ek wat weet van die regte posisie waarin ek innerlik verkeer. Ander kan nie sê deur na my te kyk nie. Jy weet, dit was goed om oor hierdie dinge te praat.
Dis moeilik, maar ek hou daarvan om dit uit te spoeg. Elke keer as ek dit doen, maak dit dinge ‘n bietjie beter. Dit help my regtig om my storie te vertel.
Translated by Elna Van Rhyn