Ukugandeleleka Ngokomkhumbulo
Indodanami uLennox, ongakaphili kuhle ngokomkhumbulo, gade afuna ukungibulala.Kungebangelo ibadi lekumbeni yami yokulala limosekile. Gade alinga ukuliphula athi ufuna ukungibulala. Ngakguwelela ngifuna irhelebho, enye indodanami uKenneth walinga ukumbamba kodwana ngeze bengakutjela amandla uLennox anawo, ngagandeleleka ngokomkhumbulo khulu.
Ngemva kwalokho ngaya kumkhozami uConstance ngayokupholisa ihlizwami, saguqa phasi sathandaza. Zimu ngirhelebha, sathandaza. ’Uphezulu, begodu uyayazi ihliziyo yami nokugandeleleka ngokomkhumbulo kwami koke. Maye! Zimu ngirhelebha. Ngababawa kuwe abantwanaba, wanginikela bona. Kwanjesi senginabo, kodwana ayikho into elungako.
Ngibawa ungirhelebhe godu. Ngilahlekelwa lithemba, yiba lithemba lami, ngiyakuthandaza.’ Ngemva kokobana sithandaze, uConstance wathi kimi: 'Uyazi bona kunomntwana kaSathani? Njeke wena umntwana kaZimu. Akasi kude, begodu ihliziyo yakhe ayisilukhuni kuwe. Qina emthandazweni, ngombana woke umzuzu, ngitjho nanyana ulele namtlhagweni wakho woke unawe.
Lokha nakakupha ubudisi, ukubumbela bona umlungele, njeke ungapheli ithemba, sele udlule kokunengi begodu gade akhona. Uzokuba nawe uze uyokufa.' Amagamakhe angiqinisa Iye zizinto ezimbilezi abakhozi bami, nekholo lami ezingenza ngiragele phambili ngokuphila.
Ukuthola irhelebho
Kwanjesi sele ikhona into engiyenzileko ngoLennox. Akazi yena, kodwana ngomvulo ama-social worker ayeza azomthatha amusa e-Lentegeur Psychiatric Hospital. Sele ngikhulumisene nendodakazi yakhe begodu sivumelene bona kufanele kwenzeke lokhu sele sikuhlelile. Lokhu kuzongirhelebha khulu.
Uyazi kizo zoke izinto ezihle ezingenzakaleleko ebuphilweni bami, kukhona enye engiyithabelako, kukobana ingaphandle lami aliwutjengisi umtlhagwami. Ngiyayithanda indlela engiqaleka ngayo ngaphandle ngombana iyathembisa. Ngimi ngedwa owaziko bona nginjani ngaphakathi. Abanye abakuboni lokho nabangiqalileko.
Uyazi, kube bhedere njani ukukhuluma ngentwezi zoke, kubudisi kodwana ngiyathanda ukukhuluma ngazo. Ngesinye nesinye isikhathi kwenza bona ngizizwe bhedere, kungirhelebhe khulu, ukukhuluma ngendabezi.
Translated by Busisiwe Skhosana