Kuhlangahlangana Lokubi
Indvodzana yami Lennos, longekho kahle enhloko, abefuna kungibulala. Kungako lesivalo sasekamelweni lami silimele ngalendlela. Abezama kusihhwabula afuna kuvula atsi ufuna kungibulala mine. Ngangimemeta ngikhala ngicela Lusito. Indvodzana yami lenye Kenneth abezama kumubamba kepha angeke ngikutjela lamandla Lennox labekanawo.
Kwakukukhatsateka lokubi. Ngemuva kwaloko, ngaya kumngani wami Constance ngapholisa inhlitiyo. Saguca ngemadvolo sathantaza. ʹNgisite, nkosiyami,ʹ sathantaza. ʹUmkhulu uyesabeka, futsi uyayati inhlitiyo yami, konkhe kukhatsateka kwami. Nkulunkulu wami, ngisite. Ngakucela bantfwana, wase unginika bona.
Nyalo nginebantfwana, kepha yonkhe intfo ihamba kabi. Ngicela ungisite futsi. Ngilahlekelwa litsemba. Ngicela ube litsemba lami, ngiyathantaza kuwe.ʹ Ngemuva kwalomthantazi, Contsance watsi kimi: ʹUyati kunemntfwana wa Sathane? Kepha, ungumntfwana wa Nkulunkulu. Akekho khashane, futsi inhlitiyo yakhe ayikho lukhuni kuwe.
Cina ngemthantazo, ngoba sonkhe sikhatsi, ngisho nasebutfongweni bakho nasebuhlungwini bakho, unawe. Ngekukunika bulukhumi, uyakwakhela kutsi umlungele yena. Ngakoke ungalahli litsemba. Wengcile kulokuningi, futsi bekakhona. Utobanawe uze uyokufa.ʹ Emavi akhe angicinisa. Yebo, nguleti tintfo letimbili, bangani bami kane nelitsemba lami, lokungenta ngichubeke.
Kutfola Lusito
Nyalo, sekukhona lengikwentile ku Lennox. Akakwati yena, kepha ngeMsombuluko lalabasebentela umphakatsi batofika bamtsatse bamuyise ePsychiatric Hospital (Esibhedlela Setinhlanya). Ngikukhulumile loko nentfombi yakakhe savumelana kutsi kutokwenteka njalo, futsi sikulungiselele. Loku kutongisita kakhulu.
Uyati, kutotonkhe letintfo leticondzile emphilweni yami, kukhona kunye lengikujabulelako. Kutsi lingaphandle lami alikhombisi kuhlupheka kwami. Ngiyalitsandza lingaphandle lami, ngoba liyatsembisa. Ngimi kuphela lowatiko simo lengime kiso ngaphakatsi. Labanye angeke basho nabangibona. Uyati, kube ngulokuhle kukhuluma ngatotonkhe leti tintfo.
Kundzima, kepha ngiyatsandza kukuphefumulela ngaphandle. Sonkhe sikhatsi nangikwenta, kwenta tintfo tibe ncono. Kuyangisita kakhulu, kukhuluma ngetindzaba tami.
Translated by Phindile Malotana