Kugadla Lokwaba kubi
Ngenyanga yeNkhwenkhweti nga 2001, umkhukhu wami washa wangcongca, netintfo tami tonkhe lebetikhona lengekhatsi. Lomlilo wacala kumnyango wangaphambili futsi ngabe savaleleka lengekhatsi safa kube bekungasiko kwenta Kwemuntfu lolungile lowabona lentfutfu wase uvula lomnnyango angaphandle ngensimbi lecijile.
Umlilo sehlakalo lesibi uma uhlala emkhukhwini. Asinagesi ngakoke uma sitofu sapharafini noma likhandlela liwa, kungashisa lomkhukhu. Konkhe kuyasha kungcongcwe ngemizuzu lembalwa. Kute sikhatsi sebacimi mlilo kutsi bafike futsi kute nesikhatsi sekuphuma.
Kwesaba kwetfu lokwabakhulu kuvuka emkhukhwini loshaka futsi nekungakhoni kuvula umnyango wekuphuma ngesikhatsi. Loku kwenteka kubantfu labanye labaningi futsi kucishe kwenteka kimi.
Ngalahlekelwa ngiko konkhe, kusuka kupasi lami kuya etimphahleni tami, kulowo mlilo. Kwakukubi kakhulu, kwaba kugadla lokumatima. Kodvwa kwaba yingucuko lebalulekile, kwakhanyisa tinzunzo letinhle ngekhatsi kimi.
Kushisa Sifiso
Lomuntfu lolungile wanginika iloli lebeyigcwele emapulango khona bantfwabami batokhona kwakha lomunye umkhukhu wetfu kantsi nenhlitiyo yami yakhululeka ngalokulunga kwalomuntfu, kepha kusukela lapho emkhukhwini angeke wenetiseke. ʹKufanele ngitfole indlu yesitini,' ngatjela Anthony na Phyllis. ʹAngifuni kufela emkhukhwini.ʹ Loku solo kushisa Sifiso sami.
Ngicitsa sikhatsi nemandla ami ngizama kutfola indlu yami kungakafiki sikhatsi sami sekufa. Kutawube kusho kutfola indzawo lapho ngitobe ngiphephe khona futsi ngingagcina sitfunti sami. Angifuni kushona ngingumake lophuyile, endlini yemake lophuyile.
Ecinisweni, lokutoba kahle kakhulu kutsi ngife nasenginemashumi layimfica nalokumbalwa, ngoba ngifuna kucedzela lendlu besengihlala kiyo iminyaka lembalwa ngetulu. Ngiyacela, kuNkulunkulu, kutsi angivumele ngiphile ngize ngibe neminyaka lemashumi layimfica, kuze ngikhone kwentea konkhe loku kwenteke!
Translated by Phindile Malotana