Matlhotlhapelo a a Bosula
Ka Moranang 2001, mokhukhu wa me o šele lorelore, ka dithoto tsotlhe tsa me ka mo gare. Molelô o simologile fa lebating la kwa pele mme re ka ne re gaeletswe ka fa gare le go tlhokafala fa nkabe Mosamarea yo o Molemô a sa bona malakabe le go bula lebati gotswa kwa ntle ka tshipi. Molelô ke setshosetsi se se kotsi fa o dula mo mokhukhung.
Ga rena motlakase mme fa setofo sa parafene kgotsa kerese e wa, e ka tshuba mokhukhu. Sengwe le sengwe se tuka lorelore mo sebakeng sa metsotswana. Ga gona nako ya gore setima-molelô se goroge mme ga gona nako ya go sutlha. Letshogo la rona le le golo ke go tsoswa ke mokhukhu o o tukang le go retelelwa ke go notlolola lebati la kwa pele ka nako.
Seno se diragaletse batho ba le ba ntsi mme se ratile go ntiragalela. Ke latlhegetswe ke tsotlhe, go tloga ka lokwalo-itshupo lwa me go fitlha ka diaparo, mo molelông oo. E ne e le matlhotlhapelo, matlhotlhapelo a a bosula. Fela e ne gape e le nako ya phêtogô, go tsusitse maikaelelo a magolo ka mo go nna.
Maitlhomo a a Tukang
Mosamarea yo o Molemô o ne a nneile mokoa wa dipolanka gore bana ba me ba nkagele mokhukhu o mongwe, mme pelo ya me e ne ya thuthafatswa ke bopelotshweu jwa gagwe, fela go simolola ka motsi oo mokhukhu o ne o sa lekana. 'Ke tshwanetse ka gotlhe gore ke bone ntlo ya ditena', ke ne ka bolelela Anthony le Phyllis.
'Ga ke batle go swela mo mokhukhung.'. Seno e santse e le maitlhomo a me a a tukang. Ke dirisitse maatla a me a le mantsi mo go lekeng go bona ntlo ya me pele ke tlhokafala. Go tla raa gore go nna le lefelo le ke bolokesegileng mo go lona le le tla tsholang seriti sa me. Ga ke batle go tlhokafala ke le mosadi yo o humanegileng, mo ntlong ya mosadi o o humanegileng.
Ebile, selo se se siameng ke gore ke tlhokafale fa ke le dingwaga di ka nna 90, ka gonne ke batla go feleletsa ntlo enô mme ke dule mo go yona dingwaga di le mmalwa. Ka kopô tlhe Modimo, ntetle gore ke tshele go fitlha ke nna le dingwaga di le 90, gore ke kgone go diragatsa tseno tsotlhe!
Translated by Nchema Rapoo