Go Aga Mokhukhu
Re tlile mo Crossroads go aga mokhukhu. Re ne ra tshwanela ke go rema ditlhare ka thipa ya panga, go bula phatlha mo re ka agelang mokhukhu mo go yona. Re ne re sa itse go aga, fela nna le Nomhle re ne ra ithuta mo basimaneng bangwe koo. Ba ne ba itiretse mekhukhu ka dithobane le disailê tse kgolo tse di borokwa tsa kwa seporong.
Re bone karolwana nngwe ya sailê kwa thotobolong. Batho bangwe ba ne ba sa rate sailê enô ka gonne e ne e kgagogile, fela re ne ra e dirisa. Fa re bona lenathwana la sailê, re ne re le tsaya le go le rokelela ka bothale mo go le le golo.
Fa phefo e tla, sailê e ne e fofa. Go a ntshegisa, go gopola. Re ne re sa kgone go reka bolao, ka jalo re bone lebati la logong kwa thotobolong mme ra le pega mo dikotikoting, mme ra ala dikobô mo godimo. Go ne go sena materase. Re ne re tsaya dikobô gotswa kwa thotobolong, re di tlhatswe mme re ikapese tsona, bagolo le bana.
Re ne re bitsa malao anô 'malao a polanka' a rona. Re ne re na le a mane a ona mo mokhukhung wa rona, mogolo le ngwana mo bolaong bongwe le bongwe. Re bone dikobô di le di ntsi kwa thotobolong, ka jalo re ne re sa gatsele, le ka mariga tota. Go dira setôfô sa go apaya, re bone motêmê wa thini kwa thotobolong mme ra phunya diphatlha mo go ona ka screwdriver.
Ke bone ditsala tsa me di dirisa setôfô se se jalo mme ka ba botsa gore se dirwa jang, mme ba ne ba mpontsha. Fa mongwe a ka utswa motêmê motshegare, fa re se teng, re ne re ya fela kwa thotobolong go batla motêmê o mongwe.
Translated by Nchema Rapoo