Kuvulela Kukhanya
Ngilala phansi embhedzeni wami bese ngiyatigoca, ngindzimundzimu ngekudzabuka kwami. Lapho, ebumnyameni bendlu yami, ngivulela lobumnyama kutsi bungene kimi bese buyangengama ngase ngitsatsa sincumo kutsi ngitotibulala. Indlela letobalula kutsi ngilale ngibheke phansi esitimeleni dvute nasekhaya kami eKhayelitsha bese ngimela sitimela kutsi sifike.
Ekugcineni, ngitabe sengiphumulile. Kepha akuzange kwenteka ngoba, ngaleso sikhatsi, indvodzana yami Anthony yefika yanconcotsa emnyango wami. Wavele wagucula ingcondvo yami yekutibulala. Kwakungumnyaka wa 2001, futsi kwesikhashana bengingakhoni kwenta lutfo kepha ngikhala nje, ngikhala ngiphindze ngikhale futsi.
Ngangikadze sengidziniwe ngulentfukutselo lebeseyigcwele kimi yonkhe leminyaka. Besengikadze ngingasayifuni lemphilo ya Alicia Mdaka, lemphilo lebekangeke aze ayikhetse yena, kube bekakadze akhona kukhetsa. Ngangiyinyanya yonkhe futsi ngitinyanya kwamine ngekugcilateka kiyo, kodvwa ngangikadze ngingayiboni indlela yekuphuma.
Nimubonile yini Make wami?
Ngasuka ngakhiya umnyango wami wangaphambili, ngavala emakhethini ami ngase ngibhaca kulobuntima basendlini yami. Kwase, ngelifasitelo, kwefika livi la Anthony akhuluma namakhelwane, make lomdzala le libito lakhe angisalikhumbuli nyalo. ʹNgabe umubonile yini make wami?ʹ wabuta. ʹCha,ʹlomake lomdzala waphendvula. ʹngibone labatukulu, Thuthukani kanye na Juliette, baya esikolweni, kepha bekukadze kusekuseni.
Angimati kutsi ukuphi.ʹ ʹYebo, loko kwangitsintsa. Ngagijima ngaya emnyango ngayovula. Umangabe atofuna kubulala umnyango, ngingamane ngimentele umsebenti ubelula ngimkhokhe etinkingeni ngiphindze ngisite umnyango wami. ʹHhayi, ungaphuli lutfo, ngiyakuvulela,’ngamemeta, ngase ngiyavula.
Wangibuka kanye ebusweni bami lobuvuvukile wase uyangibuta, ʹMake, yini leleyentekako? Ukhalelani?ʹ Ngako, kwadzinga kutsi ngikhulume liciniso. Kukokonkhe lokuvivinywa kwemndeni wami, Anthony wazama lokungangemandla akhe kungisita. Watsi nakahlala nami, bekavame kwenta sidlo sasekuseni entele batukulu aphindze aletse ekhaya imadlana nakatfole umsebenti. Unenhlitiyo lenhle futsi ngiyametsemba.
ʹAnthony, angeke ngisakhona kuchubeka,ʹngamtjela kanjalo. ʹAngikhoni kucabanga ngalenye indlela nyalo ngikhetse kulandzela emadvodzakati ami. Ngifuna kuba nabo. Ngifuna kuya endzaweni lencono. ʹAngati kutsi ngiyitsini kuwe ngendlela lepholile — bengilele lana ngicabanga lutsi ngingakucedza ngani konkhe loku.ʹ Wabamba sandla sami, wangihlalisa kulosofa satsi nasesihleti wangibuka ekhatsi emehlweni.
Akazange awasuse emehlo akhe kimi kwesikhashana. ʹUyati kutsini?ʹ washo kimi. ʹWaba setingotini letintsatfu temoto, walimala kito tonkhe, kepha Nkulunkulu wakuphilisa. Wafa luhlangotsi katsatfu kepha nkulunkulu wakusindzisa. Uyati kutsi leni? ʹBekati kutsi ngalelinye lilanga utotsatsa bo dzadzewetfu Olive na Prudence, kantsi nebantfwababo batoshiyeka ngemuva. Abedzinga wena kutsi ubanakekele labantfwana. Bayakudzinga, make. ʹUma uhamba nyalo, kutowentekani kibo?
Kutoba yintfo lembi, lembi kakhulu. Kumele uyekele kucabanga ngalendlela.ʹ Emavi akhe abefana nemanti labandzako lageleta kimi, angenta kutsi ngivuke. Ekudzabukeni kwani, batukulu bami banyamalala bayangemuva kwengcondvo yami. Kepha bebaphila — bebaphila, bengikadze ngingafuni kuba — nematsemba kanye nekwesaba kutsi ngikhumbula kahle ebuntfwaneni bami. ʹAsithantaze,ʹ ngasho njanlo. Saguca ngemadvolo ngase ngiyakhala, ngakhala, ngikhulula inhlitiyo yami k uNkulunkulu.
Ekugcineni, Anthony watsi, ʹAmen.ʹ Wase ugucukela kimi. ʹMake, ungakwenti loku futsi, ngiyakucela. Ngicela ungaphindzi ucabange ngako futsi.ʹ ngase ngivula umnyango wangaphambili ngase ngivula lamakhethini ngentela kungene kukhanya. Kwaba kugcina kwetinyembeti ngalelolanga. Nyalo yiminyanga leminingi kusukela ngifuna kutibulala futsi tintfo teseselukhuni.
Ngisatsatsa kwekususa kukhatsala onkhe malanga, kanye nemaphilisi ekumisa kufa kwelihlangotsi. Kepha kulamalanga lamaphilisi akusiyo intfo lengenta ngichubeke. Kuletinsuku tsine bo gogo sicala kwati kakhulu ngetintfo letenteka etimphilweni tetfu futsi nangekusitana kutsi sicine, esontfweni lami kutotonkhe tinhlanga lesitakhile sisonkhe, boGogo Labalwa Nebuphuya neMbulalave, lesikubita iGAPA.
Bodzadzewetfu baka Gapa bangeluleka mine baphindze bangidvudvuta. Kube bekungesibo, ngabe ngafa nyalo; angingabati ngaloko. Singumundeni lomkhulu wabogogo lonakekelanako, sisusa tinkinga, siphindze sifundzisane tsine sodvwa kutsi sihleke.
Translated by Phindile Malotana