Go Dumelela Lesedi
Ke ile dula godimo ga malao a ka, ke kobegile, ke nyamišitše ke bohloko. Gare ga lefifi la phapoši ya ka ke ile ka dumelela gore lefifi gare ga ka le tsoge le ngatelele gomme ka tšea sephetho sa go fetša bophelo bja ka.
Selo se se bonolo ke go ya ke robale mo seporong sa terene kgaswi le gae mo Khayelitsha e be ke emela terene.
Na o Bone mme wa ka?
Bjalo, ka notlela lemati la ka la mo pele, ka kwalela seširo ka iphihla mo lefifing ka ntlo ya ka. Go ile gwa tsena lentšu la Anthony ka lefastere, a bolela le moagišane, mosadi yo mogolo yo leina la gagwe ke sa legopolego gonabjale. 'Na o bone mme wa ka?' o ile a botšiša. 'Aowa,' Mosadi mogolo o ile a araba. 'ke bone ditlogolo, Thuthukani le Juliette, ba ya sekolong eupša e be e sa le ka mesong.
Ga ke tsebe gore o kae.' Anthony o ile a re, 'Ke mo reketše dipitša le dipane,' lentšu la gagwe le be le le bofefe e bile le le bonolo o kare dilo kamoka mo lefaseng di lokile. 'Ke lekile lemati la gagwe eupša le notlilwe. Ke nagana gore ke ile go roba senotlelwa gore ke kgone go bea dipitša tše.
Ke tla no lokiša lemati ka moragonyana.' Seo se ile sa ntšhikinya, ke ile ka emelela ka lebelo ka ya go bula lemati. Ge a nyaka go lehela dilo ka gare, go kaone ke mo afolele boima gomme ke boloke lemati la ka. 'Aowa, o seke wa roba selo, ke tla go tsentšha,' ke ile ka hwelela, mpuleleng. O ile a lebelela sefahlego sa ka sa go ruruga ga tee, e be a botšiša, ‘Ma, na go direga eng? Gobaneng o lla?’ Ke be ke swanetše gore ke bolele nnete.
Ka gare ga mathata kamoka a lapa, Anthony o direle ka mokgwa yo a kgonago gore a nthuše. Ge a be a dula le nna, o be a hlwa a dira ditlogolo difihlolo ka mosong gomme o be a tliša tšhelete nnyana ka gae ge a šoma. O na pelo ye botse e bile ka a mo tshepa. ‘Anthony, nka se kgone go tswelelapele, ke ile ka re bjalo. ‘Ga ke bone go na le tsela ye nngwe ka ntle le go latela barwedi ba ka.’ Ke nyaka go ba le bona.
Ke nyaka go sepela ke ye lefelong le le kaone. 'Ga ke tsebe gore nka bea taba ye bose bjang go wena — ke be ke dutše mo, ke šomana le gore ke tlo fetša bjang bophelo bja ka.' O ile a tšea seatla sa ka, a nkiša mo sofeng gomme ge se re dutše o ile a ntebelela ka gare ga mahlo. O be a sa tloše mahlo a gagwe. 'O a tseba ke eng?' a realo. 'O be o le gare ga dikotsi tša koloi tše tharo, o ile wa gobala gare ga tšona kamoka, e fela Modimo o ile a go phološa.
O ile wa ba le stroke ga raro gomme Modimo a go phološa. Na o tseba gore gobaneng? O be a tseba gore ka letšatši le lengwe o tlo tšea dikgaetšedi tša ka Olive le Prudence, gomme bana ba bona ba tlo šala morago.
O be a nyaka gore wena o hlokomele bana.' Ba go hloka. 'Ge o ka sepela gonabjale, go tlo direga eng? E tlo ba šoro ye kgolo. O swanetše go tlogela go nagana ka mokgwa yo.' Mantšu a gagwe e be a ka re meetsi a go tonya a nhlapiša, a ntšhoša gore ke tsoge.
Gare ga bohloko bja ka, ditlogolo tša ka di ile tša timelela ka morago ga hlogo ya ka. E fela ba be ba phela — ba be ba phela, bjalo ka ge nna ke be ke sa nyake go phela — ka ditshepo le dipoifo tšeo ke di gopolago go tšwa bo nnyaneng, ka nako ye ke be ke sa gola. 'A re rapele,' ke re bjalo. Re ile ra khunama ka mangwele gomme ra lla, re tšhollela dipelo tša rena go Modimo. Mafelong Anthony a re, 'Amen.'
Translated by Lebogang Sewela