Mowana o fana ka dijo, metsi le tlhale, fela gape o na le ditiriso tsa kalafô. Matlhare a maša a diriswa mo go apeeng kgotsa go alafeng letshoromo. Ditlhale tsa lekwati di dirisetswa go dira dithapô, pampiri le go loga masela fa metsi a a tlhokwang ka tshoganyetso a ntshwa mo dikaleng le mo kotung. Lorole lwa leungo ke motswedi wa tlhagô wa calcium (Ca), lo na lo magnesium (Mg), potassium (K) le B-complex vitamins mme lo dira gore senô se nne le Vitamin C e e kwa godimo.
Malomo a ona a masweu a a lepêlêlang mme a thunya go simolola ka Diphalane go fitlha Sedimonthole, a dulafatswa ke bommamanthwane mme a tlhagise leungo la sebopego sa lee ka sekgapha se se thata se se apesitseng leungo le le lorole le dithapo tse di humileng ka oli. Leugo - la boleele jo bo fitlhang 12cm - le omelela mo setlhareng mme le wele fatshe fao le kotulelwang teng. Go fopholetswa fa mowana o tsaya dingwaga di le 8 goya go 23 pele o ka tlhagisa dithapo mme semela se se godileng se ka tlhagisa go feta 30kg ya maungo.
Ka monkgonyana o o monate le go elela go se nene, oli ya mowana e a jega, fela e diriswa gantsi mo madirelong a ditlôlô. Oli e na le diesiti tsa mafura a a loileng gotlhele, a a loileng ntle le bontlhabongwe le a a loileng ntle le maphata ale mmalwa, ka omega-6 e e ka nnang 30%. Setswaki se se mo oling (β–sitosterol) ke antioxidant e e bogale e e ka fokotsang tshenyegô ya DNA mo diseleng. E na le di-Vitamin A (e e ntšhwafatsang lotha lwa disele), D3, K le E. Oli ya mowana e gamolwa gantsi ka botsididi mme e dira oli e e siameng ya go thôba mmele, e e monyelegang ka bonako.
Oli ka setso e dirisetswa go alafa marinini a a rurugileng, fela e ka ungwela moriri o o omeletseng, e alafa dipounama tse di phantseng, e diriswa jaaka setlôla-letlalo le go alafa di stretch mark ka go tsosolosa popego ya collagen. Go fodisa ga yona go thusa mo kalafong ya eczema le psoriasis, mme go itsagale fa e kgona go buseletsa le go tlôtsa karolo ya letlalo ya epidermis.
Mewana e ka jadiswa gotswa mo dipeong mmogo le ka go tlhogelela kgotsa ka go jalelela matlhogela a a tlhagisitsweng ka tlhagô. Setlhare se mela mo mafelong a a omeletseng go se nene goya go a a mogote a dipula, fela se tshaba segagane. Mewana ke batshodi ba mealybugs, tse di tsamaisang malwetse a cocoa.