Mekgwa ya tsamaiso ya temo ya di-litchi e itshetlehile ho mokgwa wa tsamaiso, botebo ba temo le mofuta wa semela. Sena se ka kenyeletsa ho nontsha, ho nosetsa, ho faola, ho tlamella, tshireletso ya dimela le tshebetso ka sulphur dioxide kamora kotulo.
Keletso e tebileng e ka fumanwa ka ho kenela dihlopha tsa dithuto le ho baeletsi ba temo ba tshepahalang. Mokgatlo wa Dihwai tsa Litchi Afrika Borwa (South African Litchi Growers’ Association - SALGA) o tshehetsa le ho tsamaisa tlhahiso ya litchi hammoho le thekiso Afrika Borwa mme o ka thusa le ka keletso ka mekgwa ya tsamaiso bakeng sa litchi.
Tsamaiso ya Masimo a Tholwana a Litchi
Difate tsa litchi di hlaha merung ya tropike ya borwa ba China. Dibakeng tse tlase tsa tlhahiso Afrika Borwa, tlhahiso e atlehileng ya litchi e itshetlehile ho nosetseng. Mokgwa le makgetlo a ho nosetsa a ka itshetleha dilemong tsa sefate, boemo ba lehodimo le mofuta wa mobu. Jwalo feela ka ho nosetsa, ho nontsha ke e nngwe ya dintlha tsa bohlokwa bakeng sa tlhahiso e hodimo ya litchi. Difate tse sa tswa jalwa botjha di lokela feela ho nontshwa kamora hore di hlahise mahlaku a tsona a pele. Dilemong tse pedi tsa pele, ho tshelwa ha monontsha ho lokela ho arolwa ka mekgahlelo e lekanang e robedi ka nako ya ho hola (Lwetse ho ya ho Mmesa). Kamora moo ho nontshwa ho a fokotswa.
Hangata ho nontshwa ha difate tse behang ho etswa kamora kotulo, haholo ka nako ya kgolo ya pele kamora kotulo pele difate di thunya le ho beha ha sefate sa litchi se kena nakong ya ho batla metsi le phepo. Ho nontsha ho lokela ho etswa ho ya ka tlhahlobo ya mobu le mahlaku mme ditsebi tsa phepo ya dimela kapa baeletsi ba tsa temo ba ka thusa ka lenaneo la ho nontsha.
Ka nako ya kgolo ya tholwana,mehato ya taolo ya dikokwanyana tse kgathatsang e lokela ho kenngwa tshebetsong ho fokotsa tahlehelo ya dimela ka lebaka la serurubele sa litchi, mohodi wa ‘codling’ oo eseng wa nnete le ntsintsi tsa ditholwana. Kgolo ya ditholwana e ka matlafatswa ka ho nosetswa ho lekaneng le ho nontsha hammoho le ka bolaodi ba kgolo ya dimela le ho tlamella nakong ya pele ya kgolo ya ditholwana. Ka mokgwa o tshwanang, ho nosetsa ka nepo le ho nontsha ho ka fokotsa ho wa ha ditholwana sefateng le ho tjheswa ke letsatsi. Letlowa la moriti, ho apesa masimo ohle a ditholwana, ho kentswe indastering ya tlhahiso ya litchi ka katleho e kgolo mme ho ka fokotsa ho tjheswa ke letsatsi le ho fokotsa ditlamorao tsa boemo bo bobe a lehodimo.
Ho kwahela masihla a tholwana ya litchi ka mekotlana ya pampiri ho ne ho etswa ho thibela ho tjheswa ke letsatsi, ho petsoha ha tholwana le tshenyo ke dintsintsi tsa tholwana, serurubele sa litchi, bommankgane le dinonyana. Tshebetso e matla ya basebetsi e boetseng e baka mathata a kang hlobo le ho se lekalekane ha mmala, ho kwahela ka mokotlana wa pampiri ho se ho nketswe sebaka ke diketso tse ding tsa botsamaisi. Tsena di kenyeletsa ho nontsha ka nepo le ho nosetsa e le ho thibela ho tjha ke letsatsi le tshebediso ya matlowa ho fokotsa tshenyo ya dinonyana.
Moo ho hlokehang, ho faolwa kamora kotulo ho lokela ho etswa hanghang kamora kotulo, haholo bakeng sa mefuta ya dimela ya morao nakong. Dithutswana tsa tholwana tse setseng kamora ho kotulwa le tsona di lokela ho tloswa.
Difate tsa di-litchi di hloka ho phomola pele di thunya e le ho bokeletsa mehlodi e lekaneng bakeng sa nako ya ho thunya ha difate. Ho thibela metsi ho tloha ka Tlhakubele ho ya ho Motsheanong, ho itshetlehile ka sebaka sa tlhahiso, ho ka sebediswa ho qobella phomolo, empa sena ha se sebetse ka dinako tsohle ho ya ka boemo ba lehodimo, mohl. pula ya morao ho nako ka Tlhakubele le Mmesa. Ha ho kenngwa tshebetsong tsamaiso ya kgatello ya metsi, ho bohlokwa ho dumella difate ho oma ka botlalo.
Kgolo efe kapa efe ya dimela e etsahalang nakong ya hwetla kapa mathwasong a mariha e tla fokotsa kapa hona ho thibela ho thunya ha dipalesa mme e tla hloka ho laolwa ka ho sebedisa sehlahiswa se laolang dimela sa ethephon, se bolayang mahlaku a manyane ebile se dumella kgolo ya dipalesa hang ha dithemphereitjhara di se di theohile ka ho lekaneng.
Le hoja ho sa sebediswe haholo, ho tlamellwa ha difate tsa litchi ho ka etswa bohareng ba Tlhakubele kamora hore kgolo ya kamora kotulo e thatafale e le ho kgutsufatsa kgolo ya dimela ka nako ya ho thunya ha dipalesa. Phekolo ena ha e sebetse kamehla ka ho lekaneng ho thibela kgolo e ntjha ya mahlaku moo ho hlokahalang hore ethephon e sebediswe.
Ho Kotula le Pheko ya Kamora Kotulo Bakeng sa Di-Litchi
Di-litchi ke ditholwana tse sa butsweng ho feta nako eo di e lekanyeditsweng, tse sa butsweng hang ha di se di kotutswe. Kgolo ya kotulo e kgethwa ke mofuta o itseng wa semela, mmala wa tholwana, sebopeho, sebopeho sa letlalo le tatso.
Kakaretso ya hlahiswa tse thata tse qhibidihang (TSS) le titratable acid (TA) tsa makgapetla a tholwana di a kgethwa mme karolo ya tsona e balwe pele ho kotulo bakeng sa ditekanyetso tse nepahetseng tsa kgolo. Bonyane ba ditekanyetso tsa indasteri bakeng sa kgolo ke TSS ho TA ya 25:1
Ka lebaka la ho butswa ho sa lekaneng ha tholwana kahara masihla kapa sefate, tholwana e kotulwa ka ho kgethollwa mathwasong a nako ya ho kotula. Ho netefatsa boholo bo lekanang ba tholwana, tshebediso ya tekanyo ya bophara ba ditholwana e a kgothaletswa. Hamorao nakong ya kotulo ha ditholwana tsohle di se di fihlile boemong bo tshwanang ba ho butswa, masihla a felletseng a a kotulwa. Thutswana ya tholwana e ka bang 3 mm e tlohelwa tholwaneng ho thibela ho taboha ha letlalo.
Difate tsa litchi hangata di kotulwa ka thuso ya leere kapa motjhini o thusang ho kotula ho fihlella difate tse kgolo. Ho kgola ho etswa ka nako e phodileng haholo ya letsatsi, ka ho kgetheha hoseng. Ho qoba ho omella le ho soothofala ha letlalo, tholwana e kotutsweng e lokela ho bolokwa e phodile ka dinako tsohle mme diroto di kwahelwe ka mahlaku kapa mokotla o kolobileng masimong a ditholwana, ka nako ya ho tsamaiswa le sebakeng sa ho phuthela.
Ka nako ya kotulo, ditholwana tse utlwileng bohloko kapa tse bodileng di a kgethwa hona masimong a ditholwana mme ke ditholwana tse phetseng hantle feela tse iswang sebakeng sa ho di phuthela. Sebakeng sa ho phuthela, di-litchi di butswelwa ka sulphur dioxide, antioxidant e thibelang letlalo ho soothofala le ho fokotsa tshwaetso ya hlobo e ka bakang ho kgutsufala ha bophelo ba sethala. Ditholwana tse romelwang ka sefofane hangata di boela di phekolwa ka di-esiti tsa tlhaho kamora ho butswelwa ka sulphur ho dumella bofubedu ba letlalo ho kgutla.
Kamora ho butswelwa le/kapa pheko ya esiti, di-litchi di kgethwa ho ya boholo. Bakeng sa Mauritius le McLean’s Red ka bobedi bonyane ba bophara ba tholwana bakeng sa ho rekiswa kantle ho naha ke 30 mm mme bakeng sa mebaraka ya lehae ke 28 mm.
Ho ya ka mmaraka, ditholwana di phuthelwa ka mabokosana a 2 kg kapa ditshelo tsa plastiki tse nyane ho feta moo. Bakeng sa poloko e eketsehileng, mabokosana a di-litchi a ka pakelwa ka pampitshana e lokollang sulphur dioxide butle hodima ditholwana.
Themphereitjhareng e ka phaposing, bophelo ba sethala ba litchi e sa phekolwang ke matsatsi a mmalwa feela. Feela, ha e paketswe kahara ditshelo tse kwetsweng mme tsa kenngwa sehatsetsing tsa 4˚C, e ka dula ho fihlela dibekeng tse pedi. Hang ha e se e phekotswe ka sulphur, ditholwana di ka dula ho fihlela dibekeng tse hlano ho 1˚C. Di-litchi di tla omella mme letlalo la ba lesootho ka lebaka la ho fellwa ke metsi.
Bofokodi Temong ya Di-Litchi
Tlhahiso ya di-litchi Afrika Borwa hangata e sitiswa ke tjhai e fokolang e bakwang ke ho thunya ha dipalesa ho sa tsitsang le ho beha ha ditholwana ho tlase. Le ha ho le jwalo, ka mekgwa ya tsamaiso ya masimo a ditholwana e nepahetseng, tjhai e fihlang ho ditone tse 20 ka hektara e ka fihlellwa.
Phetoho ya boemo ba lehodimo ka dinako tsa selemo ka lebaka la phetoho ya maemo a lehodimo e na le sekgahla se holang tlhahisong ya litchi.
Ho fokotsa ditlamorao tsa phetoho ya maemo a lehodimo ka ho sebedisa mekgwa ya taolo ya masimo a ditholwana e tla ba senotlolo tlhahisong e ntle ya ditholwana le tholwana ya boleng bo botle nakong e tlang.
Translated by Maletsatsi Sejake