Indlu Lenhle Yesitini
Nyalo nginentfo lengingamamatseka ngayo. Nginendlu yesitini lenhle. Ngacela Nkulunkulu indlu yesitini, kepha enhlitiyweni yetinhlitiyo ngangesaba kutsi ngitofela emkhukhwini. Ngako ke ngesikhatsi Bantfu Betiko Letindlu befika batongitjela kutsi kumele ngehlise umkhukhu wami kuze ngitokwakha indlu kulendzawo, ngajabula kakhulu. Kungena lana wawungatsi liphupho.
Kundzima kakhulu kuhlala emkhukhwini. Uma kuhhusha, awulali ngoba ucabanga kutsi lomkhukhu utophephuka. Bese eKapa kuhhusha emaviki kuzo kuyophela. Munye wemadvodzana ami bekavame kuvuka ebusuku abambe lamapoli, khona angatophephuka. Awulali kahle uma kumele ubambe umkhukhu wakho ebusuku.
Bekutsi nakufika litulu, bekudzinga kutsi sibeke libhakede embhedzeni wetfu noma lamanti bekangahlala kuletingubo, futsi uma kubandza ngaphandle kulomkhukhu khona kuba ngatsi komele emanti. Futsi kukhona netilwanyana ngendzaba yalesihlabatsi sase maFlethini ase Kapa.
Satsi nasihlala esayithini lese C, intfo yekucala lesayenta nasingena kulomnyango sagobondzela sacala kutinwaya imilente. ʹIntfo yekucala lekubingelelako nawufika ekhaya nguletilwanyana.ʹ kanye nangikulesayithi lese C, umkhukhu wami washa kwase futsi kwaba bete ngisho kunye lokusalako. Loku kwenteka kubantfu labaningi.
Ngako ke nyalo, kuba nelikhaya lelikahle, ngitiva ngikahle futsi ngiyatichenya. Ngivela nje labo bantfu labashona kungakefiki lesisikhatsi futsi abakhonanga kubona leti tintfo tenteka.
Lokunguyena Abondla/Abanakekela
Munye wemadvodzakati ami sewashona. Nyalo ngihlala nalelenye indvodzakati yami kanye nendvodzana yami, kanye nebatukulu bami lababili. Indvodzana yami beyivame kubasidzakwa, kepha nyalo utfole umsebenti lokahle usebentela hulumende, uklina lapho kuhamaba khona emanti kanye nemithoyi ngisho nekuya phansi lapho kuphumela khona emangcoliso.
Waceceshelwa kwenta loko futsi uyatfokota ngekutfola lomsebenti, ngoba iminyaka lemitsatfu abenganamsebenti. Kepha bekakweneta bantfu timali letiningi futsi bayibamba emholweni wakhe. Indvodzakati yami ngalesinye sikhatsi iba nemsebenti, kepha ubhadalwa emakhulu lambalwa ngenyanga, futsi uyicitsa yonkhe ekubhadaleni sitimela kuze akhone kufika emsebentini. Ngicabanga kutsi kukabi.
Kepha ke, ngimi lolokunguyena abuke umndeni wami nyalo. Nginephenisheni kantsi futsi nase Gapa ngitfunga emajezi kanye nemidola bese ngiphindze ngiyakolosha. Bantfu bayatitsenga letitintfo lengitentako futsi sitfola imali leningana.
Asivami kuba nentfo leningi yekudla ngako kulukhuni kunakekela umndeni wonkhe. Kepha imphilo ayisiko yimbi ngalendlela beyingiyo phambilini, iminyaka leyengcile. Ngiyazama Kubeka tinkinga tami ngemuva kwami, nekusebentela phambili.
Translated by Phindile Malotana