Kuvalelisa Kokugcina
Bengise kucaleni womnyaka esikolweni ngesikhatsi babwami lobekanguThishela ashona,bengati kutsi uyagula kodva ngingati kutsi ugula nani. Ngikhumbula yonkhe intfo lelanga ashona ngalo, wacela Make kutsi amphekele kudla okumnandzi langeke akukhohlwe, bese abita umntfanakhe wentfombatane kutsi asondzele atodla naye.
Wapheka kudla okuphelele kune nyama yenkhukhu kanye nemifino lephuma engadzeni,emazambane,emakhelotsi kanye nelikhabishi. Make wangibita makacedza kumphakela kutsi ngisondzele ngitokwati kutsi ngidle naye. Wakha kudla Babe nami ngalandzela sabe sidla kanye kanye. Emuva kwemahora lamubalwa wendlula emhlabeni.
Manje lokhu senguwumfati lokhulile,sengiyabona kutsi bekangi valelisa. Emuva kokushona kwakhe bengitsi mangibuya esikolweni, ngitsatse imidoli yami ngiyodlala ethuneni lakhe, ngendlela letfusako njengo mntfana bengijabula khona. Ngibita lithuna lakhe njenge ndzawo lapho ngifike ngitfole kudvudvuteka khona, bengifika ngihlale emahora latsite.
Ngesinye sikhatsi bengifike ngilale khona lapho, leso sikhatsi ngingati nokutsi ngentani. Kodva manje sengiyabona kutsi bengitiva ncono mangidvutane naye.
Lisiko lesi Xhosa
Kutiphatsa kwami ethuneni laBabe bekadze kumphatsa kabi Make,mhlambe bekuletsa buhlungu ngekhatsi kuye,futsi atihlupha ngami. Emuva kokutsi umnyaka uphele nami ngiphase tifundvo tami,wangitsatsa kutsi ngiyohlala naGogo eTsolo endzaweni yase Eastern Cape. Make bekasebenta etindlini futsi angasitfoli sikhatsi sami emini, ngokwesiko letfu njenge maXhosa, loku kuyentiwa futsi umtali makasebenta, bantfana baya kuGogo lapho bafike bakhulele khona.
Ngako ngaya kuGogo eTsolo lapho ngafika ngafundza khona,ngafundza kuhlabelela tingoma tekudvumisa, njengalabo labagcoka, bahlabelele futsi bajika jikele inkhosana noma labaphansi. Ku GAPA yimi lohlabelela bo Gogo, ngibhodle futsi ngishaye lunyawo phansi ngemandla endvodza, wonkhe muntfu uyatfuka makabona loku.
Emalanga Okujabula Esikolweni
Thishela wami wase Tsolo, Agnes Kenu, bekavamile kuhlabela futsi asijika jikele mangabe asicocela tindzaba egumbini lokufundzela. Bengijabula kakhulu makenta konkhe lokhu,lapho abona kutsi nginotsandvo laloku futsi kungahle kube isipho nakimi. Wacala kutsi makenta lokhu angibite nami kutsi ngihlabele ngijika jika kanye naye.
Ngangihlale ngimubukile,ngatishaya sifuba ngoba ngibona kutsi nami ngiya fundza,ngokushesha kwendlula labanye bantfana besikolwa. Bengingasiyo ingelozi,benginokwenta kungeva nami, ngiyakhumbula ngelinye lilanga thishela angekho, ngaya esihlalweni sakhe ngigcwele kutitjela noku dzelela.
Ngafika ngalingisa yena ngibe ngibhala ebhodini, bantfana besikolwa bahleke. Ngaleso sikhatsi wavele wangena, ngacolisa ngoku phindza phindzana ngitsi ngeke ngiphindze,benginokungeva kodva angizange ngidzelele futsi thishela wami wachubeka wangitsandza.
Translated by Thandokuhle Motha