Indvodza lecinile, Lebeyingaphelelwa
Bekacinile, indvodza lebeyingaphelelwa, lobabe wami, Victor Thamsanqa Ngqono, ngangibuka kuye futsi ngimutsandza. Bekanguthishela welibanga lesikolwa leliphakeme kepha onkhe malanga nakabuya esikolweni bekaya emasimini ayohlanyela ummbila wakh, ematsanga kanye naletinye tibhidvo, futsi bekanakekela netihlahla tetitselo.
Abetfola emanti kumfula lomkhulu lobowungekho khashane kuze akhone kwenta indlela yekunisela tingadze kanye nemasimu etfu. Abevame kusitjela kutsi akakhoni kubona umuntfu alambile ngoba, ʹnawuyindvodza, kumele usebente kuze ukhone kunika umndeni wakho.ʹ Ngakoke asizange sesilambe.
Kutimisela Lokungapheli
Uma ngabe bekaye embhedzeni kusasa, utovuka phakatsi nebusuku ati, ʹNgisaphuma ngiyobuka onkhe lamaphayiphi laniselako.ʹ Ngentsatsakusa nakushaye insimbi yesibili angavuka, atsi, ngisayobuka kutsi tinkhomo atikaphumi yini esibayeni, ʹnoma ngisatsatsa sigulmba ngiya emasimini futsi.
ʹ Bengati kutsi uyavuka ngaletitikhatsi letingakajwayeleki ngoba bengimuva nakanyakata aphindze ahlekise make. ʹSwidilami lenhlitiyo, vuka, vuka. Kumele usebente, uyati mosi. Kumele usebente kakhulu, kakhulu,ʹ bekasho njalo. Bebabese bayahleka. Bekangaba ngumuntfu lotsandzako kuhleka, kepha, yeyi, bekanekutimisela lokungapheli.
Imfundziso ye Mali
Iminyaka lelishumi ngaphambi kutsi ashone, watsenga indlu lesetulu entsabeni,beyihambisana nesitolo lebesibitwa kutsi yi Deckert’s Hill Trading Store, endvodzeni lemhlophe lebeyibitwa ngekutsi ngu Mnumzane Groenwald. Bekuyindzawo lenhle, lenetintsaba letingatsi tiyatsanyeleka letinhle tiyigegeletile kanye nemadlelo lamakhulu layigegeletile.
Ngisho nangemnyaka wa 1995, lomnyaka lashona ngawo asayindvodza legugile, abesebenta ngekutimisela endzaweni yakhe, ahlanyele emabhontjisi kanye lanetinye tinhlobo temabhontjisi, ematsanga, emaphizi, emaskwashi, ibutternut, eggplant, cauliflower kanye nemakhabishi.
Akazange ake abenebantfu labamusitako, ngako nasisebancane safundza kuhlanyela nekuhlakula nekulima tonkhe tibhidvo. Ngangikutsandza loko kakhulu. Ngenca yekudla kwetfu lobekuvela emasimini akitsi, babe wami bekangakavami kusebentisa imali yakhe.
Esikhundleni, abeyigcina esisefeni. Bekute emabhange ngaleto tikhatsi ngako ke babe watsenga sisefo, lebesisibita sisefo 'selibhokisi lakhe,ʹ entela kugcina imali yakhe yemholo. Wacishe wangatsatsi ngisho kunye kuso. Abevama kutsi kitsi, ʹUngabi lisela, noma umboleki. Imali lonayo, yehlukanise katsatfu. Yinye yekudla, lenye yigcine bese leyesitsatfu uma bantfu bagula ekhaya.ʹ Ngakoke sasihlala sinalokuningi.
Abelukhuni kodvwa Alungile
Ngalesinye sikhatsi babe wami washintjelwa kulesinye sikhatsi kepha wangabhadalwa umnyaka wonkhe. Ngalowomnyaka, wayitsatsa imali kulesisefo sakhe wayotsenga tonkhe tintfo sasitidzinga, kepha sachubeka sadla tibhidvo letiphuma emasimini etfu.
Yatsi nayifika imali yakhe lephuma kuhulumende, yaba yiningi kutsi ingakhokhela sigulumba lesisha sa Deere sitolima emasimini akhe, ngako wakhona kuwachuba kakhulu. Abenetinkhomo letiningi, lebekatifuna eTransvaal, bese tifika ngesitimela setintfo/timphahla. Babe wami abengaba ngumuntfu locinile kepha abelungile futsi.
Wasitsengela emabhayisikili lamasha edolobheni lelikhulu leliseceleni kwe Queenstown, khona nangabe afuna kusitfuma esitolo besishayela wona sibuye ngekushesha, ngaphandle kwekukhatsala. Ekupheleni kwenyanga abesitsatsa siye eQueenstown siyotsenga timphahla eBloomenthals kanye nase Sales House. Sasitivela simcoka kakhulu.
Translated by Phindile Malotana