Kuqakathekile ukwazi bona aba-avocado akavuthwa lokha nasemthini, kodwana ayakhiwa ukwenzela bona avuthwe.
Akhiwa Nini ama-Avocado
Isthelo sitlhoga ukukhiwa lokha nasele sikhulile ngebanga lokobana isthelo sama-avocado sivuthwa kwaphela ngemva kokukhiwa. Nasikhiwe singakakhuli kuhle, isthelwesi angeze savuthwa kodwana sizokurhunyela.
Ukobana uthole ikhwalithi ehle yawo, ama-avocado kutlhogeka kobana abe namafutha ayi-10%. Iinhlahlubo zokobana sele akhule ngokwaneleko zenziwa nakathonywa ukuvunwa. Ukuhlahluka kobuswe kwenziwa ngokusetjenziswa kwemitjhini ebizwa bona ma-moisture meters nanyana ngokonyiswa kwamasampula wayo e-odweni nanyana ku-micro oven.
Isivuno Sama-Avocado
Okuya ngokobana atjalwephi kanye nokobana mhlobo bani – imihlobo elungela ukudliwa msinya nanyana lada wama-avocado weSewula Africa ungathonywa ukudliwa ngoMhlolanja nge-fuerte, uphele ngoSewula nanyana ngoSinyikhaba okuya ngomhlobo we-avocado i-Lamb Hass kanye ne-Ryan. SeIe kutlanywe imihlobo emitjha etjalelwa ukungezelela iskhathi sokudliwa kwama-avocado.
Ama-avocado akhiwa ngezandla asiwe ayokupakwa endaweni lapha apakwa khona, lapha ahlolwa khona kobana akakalimali na. Abekwa ngokuya ngobukhulu bawo bese ayahlanjwa ngesibulali senkowani. Ama-avocado angapakwa emakhathonini, emathreyini, amabhegeni wenethi, nanyana eenkhwameni zetjhwaratjhwara, okuya ngokobana asemarageni enjani.
Iskhathi soke nakavunwako, akhethwa nalokha nakapakwako kuyatjhejwa kobana angoniwa mazipho, nokobana angalimali, abasebenzi bambatha amahasikune ukuvikela kobana bangoni iinthelo.
Ukubekwa Kanye Nokuvuthwa Kwama-Avocado
Ama-avocado weSewula-Africa athunyelwa kwezinye iinarha ngemikhumbi ukusuka eKapa ukuya enarheni yange-Europe.Ikhambo lokuwathumela eenarheni ezinye ngomkhumbi lithatha amalangana ahlangana kwayi-14 ukuya kwayi-18 kanye namalanga ayi-25 kobana afike eemarageni ze-Europe begodu ukwenza bona angavuthwa msinya, lokha nakasathuthwako, abekwa lapha kuphole khona kanye nenqandisini ezilawulwako.
Nange lapha abekwe khona kupholile kanye namazinga womtjhiso wesithuthi aphasi, kwenza bona ama-avocado angaboli msinya, kodwana tjheja ungawaqandisi khulu bese ayalimala. Ama-avocado avuthwa msinya afana ne-Fuerte ngiwo abanomraro lo. Ukulimala kwawo alinyazwa kuqandiswa ngaphasi kwe-5°C kubanga bona atjhuguluke umbala ngaphakathi, abetshetlha ngaphakathi nanyana abenzotho namatjhatjhazi anzima enzeka esikhunjeni.
Ihlangano yabatjali bama – avocado beSewula-Africa i-The South African Avocado Growers’ Association (SAAGA) iphakamisa kobana abekwe ebujameni bomtjhiso obuhlangana kwe- 6-7°C ngaphasi kobuswe obuyi-85-95 %. Ubujamo bomtjhiso obuyi-7.5°C kilezo ezithela msinya bulungile. Ukwenzela bona iinthelo zithambe msinya, ama-avocado abekwa amalangana amabili namtjhana linye ebusweni obuyi-20-25°C ku- 95%.
Ama-avocado akukafaneli abekwe isikhathi eside nenthelo ezikhiqiza i-ethylene ezifana namabhanana, ama-abhula nanyana amakhabitjhi ngebanga lokobana irhasi ye-ethylene ingabanga kobana atjhuguluke umbala ngaphakathi. Nanyana kunjalo ukwenzela bona avuthwe msinya ekhaya, ama-avocado angabekwa bamabhanana embapiri enzotho amalangana ambalwa.
Translated by Busisiwe Prudance Skhosana