Swina nkoka swinene kutiva leswaku avocado ari vupfi riri ensinyeni, kambe rifanele ku khiwa riya furhekiwa leswaku rita vupfa.
Nkarhi wo kha Avocado
Mihandzu yifanele ku khiwa loko yi lulamerile tani hileswi yinga vupfaka ntsena loko yi khiwile. Loko rokhiwa ringa kulangi ku lulamela, muhandzu wunge vupfi naswona wuta tondova.
Kukuma khwalithi ya kahle yaku dya, avocado rifanele kuva na nhlayo ya mafurha ya kwalomu ka 10 %. Swikambelo swaku lulamela swiendliwa loko ntshovelo wungase sungula. Swikambelo swa ndzhongho swi endliwa hiku tirhisa switirhisiwa swohlawuleka leswivuriwaka ti moisture meters kumbe hiku teka swikoweto swi omisiwa eka oven kumbe microwave oven.
Ntshovelo wa Avocado
Kuya hi ndzhawu ya vuhumelerisi na muxaka-tinxaka leti hatlisaka na leti hlwelaka- ku tshoveriwa ka ma avocado e Afrika Dzonga swi sungula hi nhweti ya February hi Fuerte kutani swihena hi October/November hi muxaka wa Lamb Hass na Ryan. Tinxaka tintshwa tile ku humelerisiweni ku engetelela ntshovelo wa ma avocado.
Avocado ri khiwa hi mavoko kutani riya vekiwa laha kunga hola ri kamberiwa kuvasiseka na swifongo. Ya vekiwa kuya hi vukulu kutani ya hlantswiwa hiku tirhisa xohlantswa xa antifungal food grade wash. Ma avocado yanga pakiwa eka swibye, ti tray, swinkwamani kumbe swi sakani swa plastiki, luya hi makete.
Eka nkarhi hinkwawo wa ntshovelo, ku hlawula naku pakiwa swi endliwa hindlela ya nhlayiso swinene leswaku kunga halahariwi mihandzu; vatirhi va ambala swo sirhelela emavokweni leswaku vata tiyisisa leswaku mihandzu ayi vaviseki.
Nhlayiso Naku Vupfa ka Avocado
Ma avocado ya Afrika Dzonga ya yisiwa e matikweni yale handle hi xikepe kusuka e Cape Town kuya e Europe. Xikepe xiteka kwalomu ka 14 kuya eka 18 wa masiku na 25 wa masiku kuya fika e vhengeleni rale Europe naswona ku nonokisa mavupfelo, ma avocado ya vekiwa laha ku titimelaka kutani ya fambisiwa yari eka swibye leswi gwitsirisiweke ehansi ka xiyimo lexi lawuriwaka e (CA).
Ku titimela ka laha kunga vekiwa kona xikan’we na xifambo, swi nonokisa mavupfelo, kambe kufanele kuva na nhlayiso waku papalata leswaku mihandzu yinga vavisiwi hi xirhami. Muxaka wa ma avocado lawa ya hatlisaka ku vupfa kufana na Fuerte ya chava ngopfu xurhami. Ku vaviseka hi xirhami swinga humelela eka nhlayiso wa mahiselo yale hansi ka 5 °C naswona swivanga leswaku kuva na muhlovo woka wunga laveki endzeni ka muhandzu lowungavaka wa mpun’wa kumbe buraweni na swicoticoti swantima eka nhlonge.
Va South African Avocado Growers’ Association (SAAGA) va hlohletela leswaku mahiselo yale xikarhi ka 6 - 7 °C xikan’we na kutsakama ka 85 - 95 %. Mahiselo ya 7.5 °C eka lawa yahatlisaka ku vupfa yava kahle. Ku pfuneta ku vupfa, ma avocado ya vekiwa kuringana siku kumbe mambirhi eka 20 - 25 °C eka kutsakama lokunga kwalomu ka 95%.
Ma avocado aya fanelanga kuva ya hlayisiwa kuringana nkarhi woleha laha ku tirhisiwaka ethylene eka mihandzu yofana na ti banana, ma apula kumbe ti khavichi hikuva gasi ya ethylene yinga vanga leswaku kuva na ku cinca ka muhlovo endzeni. Hambiswiritano, ku pfuneta leswaku mihandzu yi hatla yi vupfa e kaya, ma avocado yanga vekiwa na ti banana eka phepha ra buraweni ku ringana masiku nyana.
Translated by Ike Ngobeni