Ukutjalwa Komgade Kanye ne-Hubbard Squash

Ukusatjalaliswa Kwaso

Umgade kanye ne-Hubbard squash zitjalwa ngembewu. Imbewu itholakala ekhwanyaneni esingaphakathi kwesithelo.

Indlela Yokutjala

Ukutjalwa kwenziwa ngokobana imbewu ifakwe phasi ehlabathini ngezandla nyana ngemitjhini yokutjala. Ukutjalwa kwamaplantjisi alungiselelwe ematreyini wembewu ngenye indlela ethandwako ngombana kurholela ekutheni zivunwe msinya. Imbewu ingatjalwa beyimile msinya lokha nayivaliweko nanyana ibekwe ngaphasi kwama-greenhouse ebujameni bezulu obumakhaza bebusika bangoVelabahlinze nanyana ekuthomeni kwakaRhoboyi.

Iinkhundla

©Louise Brodie

Imihlobo erharhabako esivini kufanele yenzelwe iinkhala ezihlangana kwe-75 ukuya ku-100 cm emareyini ahlukaniswe nge-200 cm. Lokhu kuhlangana kweentjalo eziyi-5 000 kanye ne-8 000 qobe-hectare.
Umhlobo olihlathi ungenzelwa iinkhala ezihlukaniswe nge-50 kuya ku-75 cm, emareyini angaba yi-150 ukuya ku-200 cm ngokuhlukana. Lokhu kuhlangana kweentjalo eziyi-8 000 kanye ne-10 000 yeentjalo qobe-hectare.

Isikhathi Sokutjala

Ukutjala imbewu yomgade nanyana ye-squash phasi kuvamise ukwenziwa lokha amazinga womtjhiso asehlabathini athoma ukungezeleleka etwasahlobo. Lokhu kungaba ngeskhathi esinye nesinye kusukela phakathi kwakaKhukhulamungu ukuya ekuthomeni kwakaSewula.

Iskhathi Sokutjala

Ukutjalwa kwamaplantjisi atjalwa lokha amazinga womtjhiso nakathoma ukukhuphuka, nokufana nokutjala imbewu. Lokhu kwenziwa phakathi kwakaKhukhulamungu ukuya kuSewula.

Isikhathi Sokuwukhulisa

I-Hubbard squash ivunwa ngemva kweemveke eziyi-14 ukuya ku-16 ngemva kokutjala imbewu. Umgade utlhoga isikhathi eside kancani kunaleso begodu uvamise ukulungela ukungavunwa hlangana kweemveke eziyi-16 ukuya ku-18 ngemva kokutjala imbewu.

Ukuvundisa

Lokhu kuvamise ukwanela kobana kungavundisa kabili, kanye ngemva kokutjala nangemva kweemveke eziyi-6 ukuya ku-8 ngemva kokutjala. Lokha nawutjalako faka ihlanganisela yezakhi ezintathu i- Nitrogen (N), Phosphate (P) kanye ne-Potassium (K). Lokhu kungenziwa nge-750 kilograms ye-2:3:4 qobe-hectare, petela ngaphezulu kwehlabathi i-20 cm ngaphambi kokutjala amaplantjisi.
Lokha umgade kanye nembewu ye-Hubbard squash zitjalwe phasi ehlabathini, kufanele kufakwe isilinganiso esifana nalesi esitlolwe ngaphezulu ngemva kokobana amaplantjisi sele amilile angaba masentimitha amahlanu ngobude.Linga ukufaka ihlanganisela le emareyi weentjalo kodwana ungafaki duze kwemirabhu ukhandela ukufunza ikhula.
Ikhula kufanele lilawulwe eemvekeni zokuthoma ezihlanu. Ihlanganisela le engaba yi-300 kilograms ye-LAN qobe–hectare ingafakwa kwesibili ngemva kweemveke eziyi-6 ukuya kweziyi-8 ngemva kokutjala.

Ukuthelelela

Ibuswe obusehlabathini kufanele butjhejwe okungasenani kabili ngeveke. Lokhu kwenziwa ngegarafu nanyana nge-augar nanyana ngokubeka imitha ehlola ubuswe emasimini. Ukugandelela komkhumbulo okubangwa kutlhoga amanzi kungona bekuphungule umkhiqizo.
Kuvamise bona kutlhogakale bona zithelelelwe ngamanzi angaba yi-30 mm ukuya ku-35 mm qobe veke. Nange ubujamo bezulu bunyuka ngezelela ukuthelelela ngombana imirabhu izele ngaphasi njeke ukuthelelela kungahlukaniswa kwenziwe kabili ngeveke. Lokhu kusiyeleliso esihle ekufanele senziwe lokha kutjalwe ehlabathini eyisanda lapha amazinga womtjhiso aphezulu.

Translated by Busisiwe Skhosana