Algemene naam: Beet
Wetenskaplike naam: Beta vulgaris
Plant Beskrywing
Beet is ’n tweejarige plant. Gedurende die eerste jaar, waarin dit normaalweg geoes word, vorm die eetbare penwortel gedeelte wat beet genoem word en waarvoor dit hoofsaaklik geplant word. Beet het hartvormige blare wat op ’n kort stammetjie van 10 tot 15 cm gedra word. As dit vir die tweede jaar in die grond gelos word, sal dit blom en dan saad voortbring.Gebruike
Die beet blare kan as ’n heerlike alternatief vir spinasie gekook word en is ryk aan vitamien A. Beet bevat baie vitamien C en antioksidante. Dit word gekook en kan warm of koud as ’n slaai geëet word. Dit word ook versap.Grondvereistes en Voorbereiding
Sanderige leemgrond met ’n goeie dreinering is die beste. Swaar kleigrond en suurgrond met ’n pH laer as 6 moet vermy word. Die grond se ideale pH is 6.2 – 6.8 en daar moet genoeg organiese materiaal teenwoordig wees.Die grond moet geploeg, skoongemaak en gelyk gemaak word voor planttyd. Gedurende hierdie prosesse kan kompos en hoendermis ingeploeg word en die grond tot ongeveer 300 mm diep bewerk word. Die area waar geplant gaan word kan met die hand of meganies opgeërd word (grond word weerskante van die saadbedding gegooi om ’n rif te vorm). Die riwwe moet 1200 mm wyd en tussen 200 en 250 mm hoog wees. Die rif moet plat bo wees om die hoër saadbedding waarin geplant gaan word te vorm.