Setlhare se itsagale gape jaaka wild plum kgotsa monkey plum. Moretologa o mela mo nageng tse di ditlhare, dikgwa tsa tlhaga le mo majweng mme gape o mela mo mebotong ya motlhwa. Mo Afrika Borwa mefuta ele mebedi e mela kwa dikgaolong tsa bokone le bogare tsa Limpopo (var. caffra) le gape kwa Mpumalanga, Limpopo le KwaZulu-Natal (var. natalensis).
Dikarolwana ka bontsi tsa semela di a diriswa. Metsi a a inetsweng mo matlhareng a diriswa jaaka setlhatswa-matlho, go alafa dikodu le go ntsha bomotlhampepe mo mmeleng. Matlhare a a dirilweng molora a diriswa mo kalafong ya tlhoka-pelegi le letshoromo.
Medi e e dirilweng lerole e diriswa mo disopong le bojalweng jaaka aphrodisiac le go alafa diso, fa motogo o o dirilweng gotswa mo meding o ka thusa go alafa pherogô-dibete ka motsi wa kimô. Leungo le le botlha le humile ka Vitamin C (27%), le jewa ke dinonyane, diphologolo le batho mme le ka dirisetswa go dira jam. Manôkô le ona a jewa. Logong lo thata mme lo dirisetswa go dira matshwaro a didiriswa kgotsa mo kagông.
Peo e na le tlhagiso e e kwa godimo (60-70%) ya mafura a a sa omeleleng a a gamolwang ka go e tsidifatsa. E humile ka diesiti tsa mafura a a sa loegang mme a diriswa jaaka mafura a lebone, le go dira matlalo a diphologolo boleta le go tshasa megala ya bora. Ka ntlha ya boesiti jo bo mafura jwa yona, oli ya ximenia gape e tsepame go oxidation, e na le ditlamorago tsa bothibela-tsofalô mme e itumelelwa ka ntlha ya go kgona ga yona go nolofatsa letlalo.
E diriswa jaaka oli ya mmele le moriri, e humile ka esiti ya ximenynic e e nang le ditlamorago tse di mosola mo tsofalong ya letlalo. Dipatlisiso mo esiting ya ximenynic di bontshitse tokafalo mo tsamaong ya madi. Tsamaiso ya madi e ne ya oketswa mo setlhopheng sa basadi ba baithaopi ba ba nang le cellulite, ka go tshasa cream e e nang 0.5% ya esiti ya ximenynic.
Ximenia e mela bonolo gotswa mo peong e e foreshe mo motswakong wa 5:1 wa motlhaba wa noka le monontsha. Ga e tshabe komelelô, e tshaba segagane go se nene mme e ka gola go fitlha boleeleng jwa 0.5m mo ngwageng.