Go ja mefutafuta ya maungo le merogo ka metlha go netefatsa tsêô e e itekanetseng ya mefutafuta ya dikotla. Dikotla di a tlhokagala go tshola mebele e e itekanetseng le ditlhaloganyo tse di nonofileng, mmogo le go thusa bana go gola sentle.
Go nna o itekanetse go rotloetswa gore go jewe gotswa mo ditlhopheng tsa dijo tse di latelang: dijo tsa setatšhe, merogo le maungo tse di foreshe, dinawa tse di omileng (kgotsa dinawa tse tala, letlhôdi kgotsa soya), nama (nama e khibidu, kgogo, tlhapi kgotsa mae), ditswa-mašwing (mašwi, madila, yogurt), mafura le metsi.
Ka go akaretsa dimela tsa selegae mo tlamelong ya dikotla mo ditlhopheng tsa dijo tse di farologaneng, phepô ya gago e ka tokafatswa. Sekai, cowpeas di na le protein le iron tse di kwa godimo (mme di ka dira jaaka diemedi tsa nama), fa mmupudu o na le vitamin C e e kwa godimo. Se se botlhokwa, dimela tseno di ka jalwa mo ditshingwaneng, masimong mme gape ka tlhagô kwa nageng.
Bosetšhaba, Afrika Borwa e tlhagisa dijo tse di lekaneng, ebile, naga gape ke montshetsi-ntle wa bontsi jwa dimela tsa dijo. Le fa go le jalo, batho ba le 14 million mo Afrika Borwa go begwa fa ba sena tshireletso ya dijo. (Tshireletso ya dijo e kaya gore go nna le dijo tse di babalesegileng di le dikotla mme di lekane). Thulaganyo ya dijo ya Afrika Borwa e ikaegile mo dimeleng di le mmalwa fela, mme mmopo o ikanngwa go feta selekanyô. Go na gape le kwelotlase mo tlhagisong-dijo ya fa gae le kakanyô e e sa siamang ya gore dimela tsa dijo tsa selegae ke tsa bahumanegi fela.
Afrika Borwa e na le tshidisano-futafuta e kgolo go gaisa mo lefatsheng. Dithoto tseno tsa tlhagô di ikadile go ralala Afrika Borwa mme gantsi di ka bontsi kwa dikgaolong tsa metse-selegae. Kwa dikgaolong tsa metse-selegae, dijo tsa selegae di ka bopa karolo e e botlhokwa ya botshelo jwa boselegae. Mefare e ka ikaega ka dijo tsa selegae go tsamaisana le diphepô tsa yona le go e thusa go falola mo dinakong tse di matsapa.
‘Tlala e e Fitlhilweng’ mo Afrika Borwa
Le fa go sena bopaki jo bo kalo ka ga tlala e e anameng mo Afrika Borwa, ditshekatshekô tsa bosetšhaba di fitlhetse ‘tlala e e fitlhilweng’ e e anameng (tlhokegô ya dikotla), le seelo se se oketsegang sa go akola ga bagolo le go sa gole sentle ga bana (kgolô e e kgoreletsegileng).Dipatlisiso kwa dikgaolong tse di humanegileng go gaisa kwa diporofenseng di le nne tsa Afrika Borwa di dirilwe ka 2013 - 2015, ke Water Research Commission (WRC) le University of Pretoria, go leba ka fao tlhagiso ya dimela e nnang le seabe ka teng mo go babaleleng dijo.
Dipatlisiso di senotse fa malapa ka bontsi a kgona go reka bopi mme a a nang le lotseno lo lo lekaneng, phepô ya bopi e ne e tlaleletswa ka seshabo sa eiye le tamati kgotsa khabetšhe.
Konosetso ya dipatlisiso e ne ele gore diphepô di ne di tlhoka bofutafuta jo bo tlhokegang go netefatsa ntshô-maatla le kgolô ya ngwana tse di tshwanetseng. E fitlhetse gape kgolagano magareng ga kgolô ya dijalo le boleng jo bo tokafetseng jwa phepô ya lolapa. Mo godimo ga fao, lotseno gotswa mo temông le tlhagiso ya dijalo tse di nosetswang lo okeditse go jewa ga nama, mae, maungo le merogo.
Dipatlisiso di supile gape gore ke dimela dife tse di ka tokafatsang phepô-dikotla. Merogo ya matlhare a botala jo bo fifetseng jaaka sepinatšhe, matlhare a bete, nettle, nightshade, thpe le blackjack di a rotloetswa mmogo le merogo e e jaaka lekaso (‘calabash’), pherefere e tala, lettuce, lephutshe, ditamati le lekgomane.
Maugo gape a oketsa dikotla mo phepông mme a a ka jalwang mo Afrika Borwa a akaretsa; mango, papaya, avocado, morula le legapu. Medi e e jaaka amadumbe le potata le yona e a kaelwa, ga mmogo le menawa, e e akaretsang Bambara groundnut, cowpeas le matokomane.
Dimela tsa selegae tse di botlhale ka metsi - dimela tse di sa tlhokeng metsi a mantsi - di akaretsa amadumbe, potata, lekaso, merogo ya Afrika e e matlhare, cowpeas, eggplant, pherefere e tala, eiye, legapu, feie, loquat, le manawa yotlhe.
Dikaelwa tse dingwe tsa patlisiso enô di akaretsa:
Jala dijalo tse di humileng ka dikotla jaaka bete.
Gelela metsi a pula kgotsa lokela nosetsô go nosetsa dijalo.
Dipeipi le dipetse di ka tlhokwa kwa dikgaolong tse di omeletseng.
Biofortification ya dijalo tse di tletseng dikotla e a tlhokega, segolo thata ka dijalo tse di mosola-pedi jaaka beetroot.Translated by Nchema Rapoo