Tlhokeho e ntseng e eketseha ya dijo tse thehilweng semeleng, dijo tse protheini e hodimo le di-oli tse phepo e ntle, e thehile thahasello e ntjha ho boleng ba phepo ya dihlahiswa tsa dijo tsa mmoane. Peo ya mmoane ha e na gluten ebile e ruile ka dimatlafatsi ka tatso e kang ya matokomane mme e hlahisa phofo e protheini e hodimo hammoho le oli e phepo e ntle.
Melemo Ya Mmoane
Peo ya mmoane (hemp) e na le protheini e hodimo (20% - 25%) mme e hodimo ka ditlheferetsi, divithamin A, B1, B6, B12, C, D le E ebile e na le magnesium, phosphorus, potassium, calcium le tshepe. Edestin, protheini e bolokwang e silehang ha bonolo e na le amino acids tsohle tsa bohlokwa mme e ikarabella ho dikateng tsa protheini ya 60-80% tsa peo ya mmoane.
Boleng bo ka sehloohong ba peo ya mmoane ke oli ya teng le sebopeho sa esiti e mafura. Peo ya mmoane e na le mafura a 25-35% eo 36% ya teng e leng mafura a polyunsaturated a kenyeletsang omega 3, 6 le 9 ya esiti e mafura. Esiti ena e mafura e fokotsa ho ruruha mme e thusa ho laola matshwao a mafu a sa foleng a jwaloka lefu la tswekere la mofuta wa 2 le ramatiki.
Makgabane a mmoane a nang le antioxidant, diteboho ho vithamin E le phytol, a thibela ‘free radicals’ ho senya disele mmeleng wa motho mme e ka fokotsa le kotsi ya mathata a bophelo a kang lefu la methapokutlo la Parkinson’s, ho hlaselwa ke lefu la pelo kapa le lefu la boko la Alzheimer’s.
Mmoane Dijong
Disebediswa tse nkuweng peong ya mmoane di ka sebediswa ho eketsa protheini, dik’habohaedreiti, oli kapa dimatlafatsi dijong tse fapaneng ho kenyeletswa le mekedikedi ya dijo e nowang le lero la ditholwana. Mmoane o ka boela wa sebediswa ho etsa dijo tse thehilweng semeleng jwaloka dihlahiswa tsa lebese, mohlala, lebese la mmoane.
Kamora ho tlhotlwa ha oli peong ya mmoane, makumane a mmoane a setseng a silwa ho etsa phofo ya mmoane, e nang le 15 - 20% ya protheini e silehang haholo. Tshela phofo ya mmoane e le phofshwana ya protheini ho di-pie, dikuku, di-muffin le bohobeng e le ho nkela phofo ya koro ya k’habohaedreiti e tlase sebaka. Sebedisa ditekanyetso tsa 25% ya mmoane ho 75% ya flouru e tlwaelehileng.
Phofshwana ya protheini ya mmoane le yona e ka tshelwa mekedikeding ya dijo e nowang le ho sopho, ha dipalesa tsa mmoane tsona di ka sebediswa ho etsa teye e theolang maikutlo ya ditlama. Ho thusa ka ho monngwa ha CBD, e qhibidihang mafureng, oli ya kokonate, botoro kapa lebese le mafura le ka tshelwa teyeng eo.
Oli ya mmoane, e hutswe peong kapa e le oli e ruileng ka CBD e hutsweng mahlakung le dipaleseng e ka sebediswa ho tshela disalateng kapa ya nowa e le moriana.
Mmoane o ka boela wa sebedisetswa ho ritela jwala mme wa sebediswa hape e le seno se loyisitsweng ho di-cocktail le dino tse ding.
China teng, peo e hadikilweng ya mmoane e rekiswa e le sejo sa nakwana ke bahwebi ba mebileng mme Russia, ‘oli e ntsho’ e hlahiswang ka peo e hodileng ka botlalo e ruileng ka chlorophyll e sebediswa haholo.
Peo ya mmoane e ka ntshwa kahara dikgaketlana (ebe e se e bitswa dipelo tsa mmoane) mme ya fafatswa hodima disalate, ya silwa mme ya sebediswa mekedikeding ya dijo e nowang le disopho kapa ya tswakwa le makipikipi, strupu, oli ya kokonate hammoho le peo ya chia mme ya bakwa ka ontong ho etsa sejo sa nakwana se romotsehang sa granola.
Translated by Maletsatsi Sejake